Read Iban Jaku-dalam 9 Bible Online

Jaku-dalam 9 - Iban bible

Jaku-dalam 9

¹Penemu-dalam udah ngaga rumah iya, lalu ngaga tujuh batang tiang ti besai dalam rumah nya.

²Iya udah ngasuh orang munuh siku jelu kena ngintu pengerami makai besai, nyampurka rempah dalam wain, lalu ngatur pemakai ba mija.

³Iya udah ngasuh bala orang gaji ti indu ngangau ari endur ti pemadu tinggi dalam nengeri nya:

⁴“Tama meh kita ke nadai nemu utai!” Lalu ngagai sida ke beli, iya nyebut,

⁵“Datai kitu, empa pemakai aku, lalu irup wain ti udah dichampur aku.

⁶Lengkaka pemeli nuan, lalu idup. Titi jalai penemu.”

⁷Enti nuan ngajar orang ke ngemesaika diri, nuan semina minta diri dipechat. Enti nuan nganu orang ke jai, nuan semina ngemediska diri.

⁸Anang sekali-kali ngajar orang ke ngemesaika diri. Sida deka begedika nuan ketegal nya. Tang enti nuan ngajar orang ke bepenemu-dalam, sida deka masa nuan.

⁹Enti nuan ngajar orang ke bepenemu-dalam, iya deka lebih agi bepenemu-dalam. Enti nuan ngajar orang ke lurus, penemu iya deka nambah.

¹⁰ Nangika TUHAN nya pun penemu-dalam. Enti nuan nemu Iya ti Kudus, nuan ulih meretika utai.

¹¹Penemu-dalam deka ngasuh nuan panjai umur.

¹²Nuan empu deka untung enti nuan bepenemu-dalam, lalu enti nuan nulak iya, nuan deka merinsa.

¹³Pemeli endang baka indu ke ragak, ke nadai nemu utai, sereta enda nemu malu.[6]

¹⁴Iya duduk ba mua pintu rumah iya, tauka ba penuduk ba endur ti pemadu tinggi dalam nengeri nya,

¹⁵lalu ngangauka orang ke mansa, ke benung ngereja pengawa sida:

¹⁶“Tama meh kita ke nadai nemu utai!” Ku iya ngangauka sida ke beli,

¹⁷“Ai ti dichuri berasai manis agi. Roti ti dichuri berasai nyamai agi.”

¹⁸Orang ke ditipu iya enda nemu diri mati lebuh sida tama ngagai rumah iya, lalu orang ke udah tama ngagai rumah nya, diatu diau dalam dunya pemati.