Read Iban Bup Pengajar 1 Bible Online

Bup Pengajar 1 - Iban bible

Bup Pengajar 1

¹Tu jaku orang siku ti bepenemu-dalam, anak lelaki David ti nyadi raja di Jerusalem.

²Pengidup nadai guna, sigi nadai guna, ku orang ke bepenemu-dalam nya bejaku. Pengidup endang nadai guna, nadai guna semua.

³Nuan bekereja seumur idup, tang nama utai ulih nuan ari nya?

⁴ Serak siti diganti serak siti, tang dunya mengkang enda berubah.

⁵Mata panas semampai tumbuh semampai padam, pulai belubah-lubah ngagai endur alai iya ti deka berengkah baru.

⁶Ribut muput ke selatan, muput ke utara, bepusin-pusin lalu pulai baru.

⁷Semua ai sungai rarat ngagai tasik, tang tasik enda nemu penuh. Ai pulai baru ngagai endur alai sungai belabuh, lalu rarat baru.

⁸Semua utai ngujung ngagai pengelelak magang, pengelelak ti enda ulih ditelah. Mata kitai enda nemu puas meda utai. Pending kitai enda nemu puas ninga utai.

⁹Utai ti udah nyadi suba, deka nyadi baru. Utai ti udah dikereja suba, deka dikereja baru. Nadai utai ti nyengala baru di serata dunya tu.

¹⁰Ku orang, “Peda kita, tu utai ti baru!” Tang utai nya ukai utai ti baru, laban utai nya endang udah nyadi kelia, lama sebedau kitai ada.

¹¹Nadai orang ingatka utai ti nyadi dulu kelia, lalu nadai orang jemah ila deka ingatka utai ti deka nyadi ari kenyau diatu nyentuk ngagai jemah ila.

¹²Aku ti bepenemu-dalam tu, udah nyadi raja menua Israel di Jerusalem.

¹³Aku udah mutuska runding deka meresa lalu belajarka semua utai ti dikereja di bap langit. Allah Taala udah ngeletak kitai ditinggang pemerinsa ti berat.

¹⁴Aku udah meda semua utai ti dikereja di dunya tu, lalu aku madahka ngagai kita semua utai nya endang nadai guna magang baka ke begagaika ribut.

¹⁵Nuan enda ulih beruruska utai ti bingkuk. Nuan enda ulih ngitung utai, enti utai nya nadai.

¹⁶ Ku aku madahka ngagai diri empu, “Aku udah nyadi orang ke tinggi pangkat, ke dalam agi penemu ari sebarang orang bukai ti udah merintah Jerusalem dulu agi ari aku. Aku nemu utai ti dikumbai penemu-dalam enggau penemu.”

¹⁷Aku mutus ati deka nemu bida entara utai ti dikumbai penemu enggau utai ti dikumbai pemeli, entara penemu-dalam enggau penemu orang ke gila. Tang aku nemu, pengawa nya baka ke begagaika ribut.

¹⁸Dalam agi penemu nuan, mayuh agi ga pengirau nuan. Mayuh agi utai ditemu nuan, balat agi ga iya ngemediska nuan.