Read Iban Bup Pengajar 10 Bible Online

Bup Pengajar 10 - Iban bible

Bup Pengajar 10

¹Bangkai lalat tau ngasuh sebutul minyak wangi bau but, lalu pemeli ti mit ngelamun penemu-dalam.

²Orang ke bepenemu-dalam endang seruran ngereja utai ti ngena, lalu orang ke beli endang seruran ngereja utai ti salah.

³Pemeli sida nyata dipeda orang kampar ke enggau sida betemu ba sebelah jalai. Sida endang ngayanka diri amat beli.

⁴Enti orang ke merintah kita ringat ngagai kita, anang muai pengawa kita, laban penyalah ti besai ulih diampun, enti kita enda bemunyi.[11]

⁵Tu atur ti enda lurus ti udah dipeda aku di dunya tu, ti dikereja bala orang ke megai perintah.

⁶Orang ke beli diberi pangkat megai kuasa, tang orang ke kaya enda dikibuhka.

⁷Aku bisi udah tepedaka ulun nepan kuda, tang orang ke tinggi pangkat bejalai kaki baka ulun.

⁸ Enti nuan numbak lubang kebung, nuan empu deka labuh ngagai lubang kebung nya. Enti nuan mumbuska dinding, ular deka mantuk nuan.

⁹Enti nuan bekereja ba endur alai orang ke ngulihka batu, nuan deka bebadi laban batu. Enti nuan melah kayu, nuan deka bebadi ngereja pengawa nya.

¹⁰Enti kapak nuan tumpul lalu nuan enda ngansah iya, nuan deka bebendar agi mantapka iya. Nuan pintar enti nuan dulu ngaga pelan.

¹¹Nadai guna nuan nemu chara bemain enggau ular, enti nuan nejuka ular mantuk nuan dulu.

¹²Utai ti disebut orang ke bepenemu-dalam, mai basa ngagai sida, tang orang ke beli dirusak jaku sida empu.

¹³Sida berengkah ngena jaku ti beli, lalu ngujungka jaku diri munyi orang ke gila.

¹⁴Orang ke beli enda nemu ngetu bejaku. Nadai orang nemu bagi utai ti deka nyadi udah bekau nya, lalu nadai orang ulih madahka ngagai kitai utai ti deka nyadi lebuh kitai udah mati.

¹⁵Semina orang ke kelalu beli lalu enda nemu jalai pulai ke rumah, ke ngelelakka diri gawa.

¹⁶Tulah meh nuan, o menua, lebuh raja agi biak umur, lalu bala tuai rami makai besai sepemanjai malam.

¹⁷Tang menua deka bulih berekat enti iya bisi raja ke nemu mutuska penemu ke diri empu, lalu bala tuai makai ba maya ti patut, lalu nemu nagang pengingin diri lalu enda mabuk.

¹⁸Lebuh nuan kelalu ngelusu lalu enggai nyeruri atap rumah diri, atap nya deka tuduh, lalu rumah nya deka runtuh.

¹⁹Pengerami makai besai ngasuh nuan gaga, lalu wain ngelantangka nuan, tang nuan enda ulih meli utai dua bengkah nya enti nuan nadai duit.

²⁰Anang nyumpah raja. Nyumpah dalam ati pen enda meh tau, lalu anang nyumpah orang ke kaya. Nyumpah sida ari bilik peninduk nuan empu pen enda meh tau, enggai ke burung mai pesan lalu madahka ngagai sida utai ti disebut nuan.