Read Iban Bup Pengajar 12 Bible Online

Bup Pengajar 12 - Iban bible

Bup Pengajar 12

¹Nya alai, kingatka Allah Taala ti udah ngaga nuan kala lebuh nuan agi biak, sebedau nuan merampau diau dalam hari enggau taun ti deka datai, lalu nuan nyebut, “Aku nadai kala lantang diau.”

²Nya meh maya penampak mata hari, bulan enggau bintang deka majak silam ba mata nuan, lalu mua hari nadai kala lesap.

³Nya baru lengan nuan, ti udah nyaga nuan, deka getar-getar, lalu kaki nuan ti kering diatu, deka nyadi lemi. Ngeli nuan nyau nadai mayuh agi kena ngunyah pemakai, lalu mata nuan nyau rabun lalu enda lansik agi.

⁴Pending nuan nyau enda ulih ningaka munyi utai ti ba jalai raya. Nuan nyau deka enda ulih ninga munyi injin padi, tauka ninga munyi musik ti ditebah orang. Tang munyi burung chukup kena ngerak nuan ke tinduk.

⁵Nuan deka rawan bediri ba endur ti tinggi, lalu bejalai pen tau ngasuh nuan bebadi. Buk nuan buban. Nuan nyau deka enda ulih bejalai, lalu semua pengingin nuan nyau nadai agi. Kitai deka mansang ngagai dunya pemati, lalu orang deka ngulit ba sebelah jalai raya.

⁶Rantai pirak deka putus, lalu lampu emas deka labuh lalu pechah. Tali ba telaga deka putus, lalu tepayan ai deka pechah.

⁷Tubuh kitai deka pulai baru ngagai amau, lalu seput pengidup ti diberi Allah Taala ngagai kitai deka pulai baru ngagai Iya.

⁸Nadai guna, nadai guna, ku orang ke bepenemu-dalam nya bejaku. Semua utai nya nadai guna magang.

⁹Tang laban orang ke bepenemu-dalam nya endang pintar, iya majak ngajar orang utai ti ditemu iya. Iya belajarka jaku-dalam, lalu mansik pengamat jaku nya.

¹⁰Orang ke bepenemu-dalam nya nguji ngiga jaku ti tau ngenyamaika ati, tang leka jaku ti ditulis iya endang jaku ti datai ari ati.

¹¹Jaku ti disebut orang ke bepenemu-dalam nya baka tungkat ti tajam ti dikena pengibun bedus nguluka bedus sida, lalu jaku-dalam ti udah dikarang tan baka paku lawang ti dipantang. Semua jaku-dalam nya udah diberi Allah Taala ti Pengibun kitai semua.

¹²Anak, bejaga nuan ari siti agi utai. Pengawa betuliska bup endang enda nemu abis, lalu enti nuan kelalu bebendar belajar, nuan deka lelak.

¹³Semua utai nya udah disebut magang, tang siti agi utai deka disebut: Nangika Allah Taala, lalu ngasika pesan Iya, laban nya endang kebuah kitai mensia digaga.

¹⁴Allah Taala deka ngakim semua utai ti dikereja kitai, nemuka utai nya manah tauka jai, nyengkaum utai ti dikereja kitai enggau chara belalai.