Read Iban Bup Pengajar 2 Bible Online

Bup Pengajar 2 - Iban bible

Bup Pengajar 2

¹Aku lalu bekira deka ngelantangka diri, laban aku keran deka nemu utai ti dikumbai pengelantang. Tang aku nemu utai nya pen nadai mega guna.

²Aku nemu, ketawa nya utai ti beli, lalu ngelantangka diri endang nadai mai penguntung.

³Ketegal aku keras deka ngembuan penemu-dalam, aku lalu bekira deka merindang lalu ngelantangka diri ngena wain. Ba penemu aku, tu jalai ti pemadu manah kena kitai idup sekumbang kitai ti diau sementara aja di bap langit.

⁴ Aku udah ngereja pengawa ti besai. Aku udah ngaga berapa buah rumah enggau kebun anggur ke diri empu.

⁵Aku udah numbuhka mayuh macham kebun enggau kebun buah, lalu nanam semua macham kayu buah dalam kebun nya.

⁶Aku udah numbak pegung alai aku ngambi ai kena aku manjah kebun nya.

⁷ Aku udah meli mayuh ulun, lalu aku mega bisi ulun ke endang ada dalam ruang bilik aku. Aku bempu mayuh agi jelu tupi ari semua orang bukai ti udah kala diau di Jerusalem.

⁸ Aku mega nugungka pirak enggau emas ari pesaka bala raja dalam menua ti dipegai aku. Lelaki enggau indu belagu merindang aku, lalu aku bisi semua indu ke dikedekaka aku.

⁹ Aku endang amat tinggi agi pangkat ari orang bukai ti udah kala diau di Jerusalem, lalu penemu-dalam ti dikembuan aku nadai kala ngelebuka aku.

¹⁰Utai ti dikinginka aku, sigi ulih aku magang. Aku endang enda betagang ngelantangka diri. Aku temegahka semua utai ti udah ulih aku, lalu semua utai nya endang upah aku magang.

¹¹Udah nya aku lalu berundingka semua utai ti udah dikereja aku, enggau pemendar aku gawa ngereja utai nya. Nya baru aku nemu, utai nya nadai reti sekali-kali, baka ke begagaika ribut, sigi nadai guna sekali-kali.

¹²Laban tiap iku raja semina ulih ngereja utai ti udah dikereja raja ke dulu agi ari iya. Nya alai aku lalu belabuh berundingka reti utai ti dikumbai bepenemu-dalam, tauka diau baka orang ke gila, tauka beli.

¹³Aku nemu, “Penemu-dalam endang manah agi ari pemeli, baka penampak ti manah agi ari pemetang.

¹⁴Orang ke bepenemu-dalam nemu tunga pejalai diri, tang orang ke beli enda.” Tang aku mega nemu, pengujung kitai endang sebaka magang.

¹⁵Ku aku berunding dalam ati diri, “Utai ti deka nyadi ba orang ke beli, deka mega nyadi ba aku. Nya alai, nama penguntung aku nyadi orang ke bepenemu-dalam?” Aku lalu nyaut, “Nadai.”

¹⁶Nadai orang ingatka orang ke bepenemu-dalam, lalu nadai mega orang deka ingatka orang ke beli. Jemah ila, semua kitai tu nadai agi dikingatka magang. Semua kitai tu, orang ke beli enggau orang ke bepenemu-dalam, deka mati magang.

¹⁷Nya alai ba aku siku, pengidup nya nadai reti, laban semua utai dalam pengidup tu nadai meri aku utai bukai, tang semina penusah aja. Utai nya sigi nadai guna sekali-kali, baka ke begagaika ribut.

¹⁸Utai ti udah digaga, enggau utai ti udah ulih aku, sigi nadai reti ba aku, laban aku nemu, aku deka ninggalka utai nya ke orang ke ngentudika aku,

¹⁹lalu iya nyangka bepenemu-dalam, tauka beli. Nadai kitai nemu. Tang taja pia, iya deka bempu semua utai ti udah ulih aku, semua utai ti udah ulih aku di dunya tu ngena penemu-dalam aku. Semua utai nya nadai guna magang.

²⁰Nya alai aku ngesal ati ke diri ti udah bebendar gawa.

²¹Nuan ngulihka utai ngena semua penemu-dalam, ngena penemu, enggau ngena pengelandik nuan, lalu udah nya nuan ninggalka semua utai nya ke orang ke nadai kala ngulihka utai nya. Sigi nadai guna sekali-kali. Enda betul sekali-kali!

²²Nuan bekereja lalu nuan ngembuan pengirau seumur idup, lalu nama utai ti ulih nuan ari nya?

²³ Seagi-agi nuan mengkang idup, semua utai ti dikereja nuan nadai mai penguntung, tang semina pengirau enggau ati ti tusah. Indah lebuh malam hari deh nuan enda badu berunding. Semua utai nya nadai guna magang.

²⁴ Utai ti pemadu manah ti tau dikereja kitai nya makai, ngirup lalu ngelantangka diri ngena utai ti udah ulih kitai. Tang aku nemu, utai nya mega diberi Allah Taala.

²⁵Baka ni ku kitai tau bisi utai diempa, tauka ulih ngelantangka diri enti nadai Allah Taala?

²⁶ Allah Taala meri penemu-dalam, penemu, enggau pengelantang ngagai orang ke ngerinduka ati Iya, tang Iya ngasuh orang ke bedosa bekereja ngulihka utai, besimpanka utai, ngambika sida bisi utai diberi ngagai orang ke ngerinduka ati Allah Taala. Semua utai nya sigi nadai guna magang, baka ke begagaika ribut.