Read Iban Bup Pengajar 3 Bible Online

Bup Pengajar 3 - Iban bible

Bup Pengajar 3

¹Semua utai ti nyadi di dunya ti endang nyadi ba maya ti diletak Allah Taala.

²Iya ngeletak maya ada, enggau maya mati, maya betanam, enggau maya ngetau,

³maya bebunuh, enggau maya nyuman, maya ngeruntuh, enggau maya niri enggau negi.

⁴Iya ngeletak maya sinu, enggau maya gaga, maya ngulit, enggau maya betanda,

⁵maya beleman, enggau maya enda beleman, maya besium, enggau maya enda besium.

⁶Iya ngeletak maya tetemuka utai, enggau maya ngelenyauka utai, maya besimpanka utai, enggau maya bebuaika utai,

⁷maya nyarik, enggau maya nyait, maya enda bemunyi enggau maya bejaku.

⁸Iya ngeletak maya rinduka orang, enggau maya begedi, maya beperang, enggau maya bebaik.

⁹Nama penguntung ulih kitai ari semua pengawa kitai?

¹⁰Aku nemu pemerat utai ti udah ditepanka Allah Taala ba kitai.

¹¹Iya udah ngeletak maya ti ngena ke semua utai. Iya udah meri kitai ati ti keran deka nemu utai ti deka nyadi jemah ila, tang Iya nadai kala ngasuh kitai puas ati nemu utai ti dikereja Iya.

¹²Nya kebuah aku nemu, kitai semina ulih ngelantangka diri aja, lalu ngasaika penyamai idup sepemanjai umur kitai.

¹³Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Allah Taala magang.

¹⁴Aku nemu, semua utai ti dikereja Allah Taala deka meruan belama iya. Nuan enda ulih nambah tauka ngurangka utai nya. Lalu siti utai ti dikereja Allah Taala nya ngasuh kitai nangika Iya.

¹⁵Semua utai ti nyadi, enggau ti ulih nyadi, endang udah nyadi magang suba. Utai ti nyadi diulang Allah Taala belama.

¹⁶Nambahka nya, aku bisi mega udah meda, di dunya tu, penyai udah nganti pengelurus.

¹⁷Ku aku berunding dalam ati diri, “Allah Taala deka ngakim orang ke lurus enggau orang ke jai, laban semua utai, semua pengawa, deka nyadi magang ba maya ti endang udah diletak Allah Taala ke siti-siti utai.”[1]

¹⁸Aku lalu berunding: Allah Taala nguji kitai, kena Iya madahka ngagai kitai, kitai tu nadai lebih ari jelu,

¹⁹laban pengujung kitai mensia enggau pengujung jelu, endang sebaka. Siku mati baka siku. Sida endang sebaka magang. Mensia nadai lebih agi ari jelu, laban pengidup bela nadai reti ba sida.

²⁰Sida sama pulai ngagai siti endur, iya nya amau. Sida sama datai ari nya, lalu sida sama deka pulai ngagai utai nya.

²¹Baka ni ku orang nemu semengat mensia deka niki ke atas, lalu semengat jelu nurun ngagai tanah?

²²Nya alai, aku nemu, utai ti pemadu manah ti patut dikereja kitai nya, kitai patut ngelantangka diri ngena utai ti udah ulih kitai. Nadai utai bukai ulih dikereja kitai. Kitai enda nemu utai ti deka nyadi ila, lebuh kitai udah mati.