Read Iban Bup Pengajar 4 Bible Online

Bup Pengajar 4 - Iban bible

Bup Pengajar 4

¹Udah nya aku lalu merening baru ngagai semua atur ti enda lurus ti nyadi di dunya tu. Orang ke kena tekan, nyabak lalu nadai orang deka nulung sida. Orang nadai nulung sida, laban orang ke nekanka pengidup sida bisi kuasa.

²Aku ngining orang ke udah mati lalu nadai agi, laban sida lantang agi ari orang ke agi idup.

³Tang orang ke enda kala ada, ti nadai kala meda pemingkuk atur ti nyadi di dunya tu, lantang agi ari orang ke agi idup enggau ari orang ke udah mati.

⁴Aku nemu, orang bebendar sereta landik gawa, laban sida ngining pangan diri. Utai nya mega nadai guna, baka ke begagaika ribut.

⁵Kenu ku sida, kitai beli enti kitai enda gawa lalu nejuka diri mati keberuran.

⁶Utai nya nyangka amat, tang manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.

⁷Aku bisi mega meda utai bukai ti nadai guna dalam pengidup tu,

⁸iya nya siku mensia ti diau kediri-diri. Iya nadai anak, nadai menyadi, tang iya seruran gawa, enda nemu puas ati ke pengaya ti dikemisi iya. Sapa orang ke disangkung iya alai iya bebendar amat gawa baka nya, datai ke nyau enda nemu ngelantangka diri? Tu pen nadai mega guna, semina merinsaka diri idup.

⁹Dua iku manah agi ari siku, laban enti seduai iya begulai, seduai iya bulih agi gawa.

¹⁰Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya.

¹¹Lebuh chelap, dua iku tau bekimbit tinduk, lalu ngangatka isi pangan diri, tang baka ni ku kitai ulih ngangatka diri enti kitai tinduk kediri-diri?

¹²Dua iku ulih ngelaban orang ke nyerang, tang enti iya ngelaban kediri-diri, iya alah. Tali begembar tiga, mar diputuska.

¹³Sekeda orang tau angkat ari penyeranta lalu nyadi raja di menua iya empu, tauka pansut ari rumah jil lalu nyadi raja, tang lebuh iya nyau tuai lalu kelalu beli lalu enggai ningaka jaku lalau, iya deka tusah agi ari orang bujang ke seranta tang nemu berunding.

¹⁵Aku berundingka semua orang ke diau di dunya, lalu aku nemu, ari bala sida nya bisi siku orang bujang ti deka ngambi penuduk raja.

¹⁶Pemayuh orang ke dipegai raja nyangka nadai sekat, tang lebuh iya nyau nadai agi, nadai orang deka meri terima kasihka utai ti udah dikereja iya. Nya alai, utai nya nadai guna, baka ke begagaika ribut.