Read Iban Bup Pengajar 5 Bible Online

Bup Pengajar 5 - Iban bible

Bup Pengajar 5

¹Bejimat lebuh nuan mansang ngagai Rumah Sembiang. Manah agi nuan kin mai ati ti keran deka belajar, ari ti keran deka ngenjuk piring baka orang ke beli, ti enda nemu bida entara utai ti ngena enggau utai ti salah.

²Berunding dulu sebedau nuan mansutka jaku, lalu anang enda berunding enggau manah sebedau nuan ngaga semaya enggau Allah Taala. Iya di serega din, lalu nuan di dunya ditu. Nya alai, anang nyebut utai lebih ari ti patut.

³Balat agi nuan irau ati, balat agi ga nuan deka jai mimpi. Mayuh agi jaku nuan, besai agi ga peluang nuan nyebut utai ti beli.

⁴ Nya alai, lebuh nuan ngaga semaya enggau Allah Taala, nuan enda tau enda enggau naka pengelengkas ngamatka semaya nya. Allah Taala enda begunaka orang ke beli. Kereja aja utai ti disemaya nuan.

⁵Manah agi enda ngaga semaya, ari ke ngaga semaya, lalu udah nya enda ngamatka semaya nya.

⁶Anang nejuka jaku nuan empu ngasuh nuan bedosa ngambika nuan enda ibuh madahka ngagai imam Allah Taala, nuan ukai sengaja nyebut utai nya. Nama kebuah nuan nyungkak Allah Taala ringat ngagai nuan? Nama kebuah nuan nyungkak Iya ngerusak utai ti udah ulih nuan?

⁷Nuan nyangka suah bemimpi, nyangka ngereja mayuh bengkah pengawa ti nadai guna, tauka kutap-kutap bejaku, tang nuan enda tau enda mengkang nangika Allah Taala.

⁸Anang tekenyit ati lebuh nuan meda perintah nekanka pengidup orang ke seranta, lalu enggai meri sida atur ti lurus, sereta enggai meri sida hak ti endang enggi sida. Genap iku pemesai endang dijaga siku orang ke tinggi agi pangkat ari iya, lalu seduai iya pen sama mega dijaga pemesai ti tinggi agi pangkat ari seduai iya.

⁹Indah pengidup raja deh bepanggai ba utai ti diketau.[2]

¹⁰Enti nuan angkunka duit, nuan enda nemu puas ati. Enti nuan ingin deka kaya, nuan enda ulih ngulihka semua utai ti dikinginka nuan. Utai nya nadai guna.

¹¹Makin kaya agi nuan, makin mayuh agi ga orang ditupi nuan. Semina utai ti ulih nuan, nuan nemu diri kaya.

¹²Bala orang ke gawa nyangka chukup tauka enda chukup utai diempa, tang sida tentu ulih tinduk jenak lebuh malam hari. Tang orang ke kaya sigi amat mayuh reta, datai ke sida nyau enda ulih tinduk laban sida irau ati.

¹³Tu utai ti jai ti udah dipeda aku dalam dunya tu: orang besimpanka duit nyadika penabat lebuh maya sida begunaka duit nya,[3]

¹⁴lalu udah nya ngelenyauka semua duit nya ngereja pengawa ti enda menuku, lalu sida nadai agi utai ditinggalka bala anak sida.

¹⁵ Kitai ninggalka dunya tu baka kitai ke datai - telanjai. Taja pen kitai bebendar gawa, tang nadai meh utai ulih dibai kitai.

¹⁶Utai tu enda betul! Kitai mupuk baka kitai ke datai. Kitai bekereja, nguji nangkap ribut, tang nama utai ti ulih kitai?

¹⁷Kitai semina idup dalam pemetang enggau penusah,[4] irau ati, ringat, sereta sakit.

¹⁸Tu utai ti udah ditemu aku: utai ti pemadu manah, ti tau dikereja kitai nya makai, ngirup lalu ngelantangka diri ngena utai ti udah ulih kitai dalam umur ti pandak tu, ti diberi Allah Taala ngagai kitai. Tu endang ungkup kitai.

¹⁹Enti Allah Taala meri kitai pengaya enggau reta tengkira, lalu nejuka kitai ngelantangka diri, kitai patut beterima kasih, lalu ngelantangka diri ngena utai ti udah ulih kitai, laban utai nya endang pemeri ari Allah Taala.

²⁰Nya alai laban Allah Taala udah ngasuh kitai diau lantang, kitai enggai kelalu irau ati ke pemandak umur kitai.