Read Iban Bup Pengajar 6 Bible Online

Bup Pengajar 6 - Iban bible

Bup Pengajar 6

¹Aku udah meda atur ti enda lurus dipejalaika orang di dunya tu.

²Allah Taala deka meri kitai pengaya, basa, enggau reta tengkira, nyengkaum semua utai ti dikinginka kitai, tang Iya enggai nejuka kitai ngelantangka diri ngena utai nya. Tang sekeda orang kampar deka ngelantangka diri ngena utai nya. Tu nadai guna, sereta enda patut.

³Kitai nyangka bisi seratus iku anak, lalu panjai umur, tang panjai naka ni pen umur kitai, nadai meh kitai ulih ngelantangka diri, lalu bangkai kitai pen enda mega dikuburka enggau menyana. Aku madahka ngagai nuan, indah anak mit ke mati lulus deh diintu orang manah agi ari nya.

⁴Nadai guna anak mit nya ada, laban iya lesap ke dalam pemetang, alai iya ke lalu enda dikingatka orang agi.

⁵Iya nadai kala meda penampak siang hari, tauka nemu utai ti dikumbai pengidup, tang iya udah tetemuka endur alai belelak,

⁶lebih agi ari orang ke nadai kala ngelantangka diri, taja pen iya nyangka idup dua ribu taun, laban seduai iya sama mansang ngagai endur siti nya aja.

⁷Kitai ngereja pengawa semina kena ngulihka utai diempa, tang kitai nadai kala bulih pemakai ti chukup.

⁸Baka ni ku orang ke bepenemu-dalam tau nyamai agi diau ari orang ke beli? Nama penguntung ulih orang ke seranta enti iya nemu ngatur ulah diri di dunya tu?

⁹Utai nya nadai guna, baka ke begagaika ribut. Manah agi enti kitai nemu puas ati ke utai ti dikemisi diri, ari ke seruran inginka utai bukai.

¹⁰Semua utai ti nyadi endang udah diletak dulu kelia, lalu semua kitai bela nemu, nuan[5] enda tau bekelikuh enggau orang ke kering agi ari nuan.

¹¹Lama agi seduai bekelikuh enggau pangan diri, balat agi ga kelikuh nya nadai guna, lalu seduai pen nadai mega bulih penguntung ari nya.

¹²Baka ni ku orang ulih nemu utai ti tau mai penguntung dalam pengidup ti pandak sereta nadai guna tu, pengidup ti ngelansa baka ayuk? Baka ni ku kitai ulih nemu utai ti deka nyadi di dunya tu, lebuh kitai udah mati?