Read Iban Bup Pengajar 7 Bible Online

Bup Pengajar 7 - Iban bible

Bup Pengajar 7

¹ Tampak nama nya manah agi ari minyak wangi ti berega, lalu hari nuan mati nya manah agi ari hari nuan ada.

²Manah agi mansang ngagai rumah orang ke ngulit, ari ke mansang ngagai rumah alai orang ke rami, laban orang ke idup seruran ingatka pemati endang nganti semua kitai.

³Sinu ati manah agi ari ke ketawa, taja pen iya mandangka mua nuan tusah, tang iya ngansah nuan ngambika nuan tajam agi meretika utai.

⁴Orang ke selalu berundingka pasal pengelantang nya orang ke beli. Orang ke bepenemu-dalam berundingka pasal pemati.

⁵Manah agi enti nuan dianu orang ke bepenemu-dalam, ari ke dipuji orang ke beli ngena lagu.

⁶Lebuh orang ke beli ketawa, iya munyi duri ti meretih diempa api. Ketawa sigi nadai reti.

⁷Nuan nyangka bepenemu-dalam, tang enti nuan ngakal orang, nuan baka orang ke beli. Enti nuan makai suap, nuan ngerusak diri empu.

⁸Pengujung utai endang manah agi ari pun iya. Ati ti liat manah agi ari penyumbung.

⁹ Anang lengkar. Nuan beli enti nuan bedendam.

¹⁰Anang sekali-kali nanya, “Nama kebuah utai menya manah agi ari utai ti diatu?” Nya ukai tanya ti dipansutka orang ke nemu berunding.

¹¹Semua orang ke idup patut bepenemu-dalam, laban penemu-dalam nya baka pesaka,

¹²lalu iya deka meri kitai pengelikun baka duit. Penemu-dalam deka ngasuh nuan likun. Nya meh penguntung bisi penemu.

¹³Peratika utai ti udah digaga Allah Taala. Enti Iya ngaga utai bingkuk, baka ni ku mensia ulih beruruska utai nya?

¹⁴Lebuh nuan mujur, nuan patut gaga ati, lalu lebuh penusah nuntung, ingatka tu: Allah Taala empu ke ngasuh pengelantang enggau penusah nyadi. Nadai nuan nemu utai ti deka nyadi.[6]

¹⁵Dulu suba pengidup aku nadai guna, tang dalam pengidup nya, aku udah meda semua utai. Sekeda orang ke manah nyangka mati, tang sekeda sida deka majak idup taja pen sida nya orang ke jai.

¹⁶Nya alai, anang kelalu manah tauka kelalu bepenemu-dalam; anang munuh diri

¹⁷tang anang mega kelalu jai tauka kelalu beli. Nama kebuah mati tumu?

¹⁸Seliahka pekara dua iti nya tadi. Enti nuan nangika Allah Taala, nuan tetap deka mujur dalam pekara nya.

¹⁹Penemu-dalam mai pengering ngagai orang ke pintar, lebih ari pengering ti dibai sepuluh iku raja ngagai sebuah nengeri.

²⁰Nadai orang di dunya tu ti nadai kala ngereja utai ti salah.

²¹Anang ibuhka semua utai ti disebut orang, enggai ke nuan ninga orang gaji nuan mechat nuan.

²²Nuan empu endang nemu diri udah suah mechat orang.

²³Semua utai tu udah diuji aku magang ngena penemu-dalam. Ku aku, “Aku mutus ati deka nyadi orang ke bepenemu-dalam,” tang aku enda tulihka nya.

²⁴Baka ni ku orang ulih tetemuka reti pengidup? Pekara tu kelalu dalam ke kitai, kelalu mar diperatika kitai.

²⁵Tang aku angkun deka belajar ngiga penemu. Aku mutus ati deka ngiga penemu-dalam, enggau saut ngagai semua tanya aku, lalu nguji nemu pemeli utai ti jai sereta mapap.

²⁶Aku udah tetemuka utai ti lebih agi tau ngerusak ari pemati, iya nya indu ke baka panjuk. Pengerindu iya ke nuan nyadi baka reti jala kena iya nangkap nuan, lalu lengan iya ti engkauk nuan, deka nanchang nuan baka rantai. Orang ke ngereja utai ti ngerinduka ati Allah Taala, ulih ngerarika diri ari indu nya, tang indu nya deka nyintak orang ke bedosa.

²⁷Tu endang amat, ku pengajar nya bejaku, aku udah tetemuka utai tu mimit-mimit lebuh aku begigaka saut.

²⁸Aku udah begigaka saut bukai, tang aku nadai tetemuka iya. Aku bisi tetemuka siku ari seribu iku lelaki ke ulih dibasa aku, tang siku indu pen nadai.

²⁹Tu meh semua utai ti udah dipelajarka aku: Allah Taala ngaga kitai lurus, tang kitai udah ngaga ulah diri mayuh macham. z