Read Iban Bup Pengajar 8 Bible Online

Bup Pengajar 8 - Iban bible

Bup Pengajar 8

¹Semina orang ke bepenemu-dalam aja ke nemu reti utai. Penemu-dalam ngasuh sida tuchum, lalu ngasuh mua sida terang.

²Kereja utai ti diasuh raja,[7] lalu anang ngaga semaya enggau Allah Taala enggau enda berunding.

³Raja tau ngereja sebarang utai ti dikedekaka iya, nya alai kejangka diri jauh ari iya. Anang diau ba endur ti tau meri penusah baka nya.

⁴Raja ngereja utai laban iya bisi kuasa, lalu nadai orang tau mantah utai ti dikereja iya.

⁵Seagi-agi nuan ngasika jaku iya, nuan likun, lalu orang ke bepenemu-dalam endang nemu jalai enggau maya sida patut ngasika jaku raja.

⁶Kitai endang bisi maya ti ngena, enggau chara ti ngena kena kitai ngereja utai, tang kitai semina nemu mimit aja!

⁷Nadai siku kitai nemu utai ti deka nyadi, lalu orang pen nadai mega madahka nya ngagai kitai.

⁸Nadai orang ulih nagang diri mati, tauka betangguhka pemati diri. Nya meh perang ti enda ulih diseliahka kitai. Ngena jalai akal pen enda meh ulih.

⁹Aku meda semua utai tu lebuh aku berundingka utai ti dikereja di dunya tu, dunya alai sekeda orang ke bisi kuasa diau, alai orang bukai ke natka diri merinsa dipegai sida.

¹⁰Endang amat, aku bisi udah meda orang ke jai disimpan dalam kubur sida, tang lebuh orang pulai ari pendam, orang muji sida dalam nengeri ti udah nyadi endur alai sida ngereja penyai.[8] Utai tu nadai guna.

¹¹Nama kebuah orang kelalu ingin deka ngereja penyalah? Laban penyalah enda diukum enggau chukup penyampat.

¹²Orang ke bedosa nyangka ngereja seratus bengkah penyalah, lalu agi mengkang idup. Aku nemu utai ti disebut sida: “Enti nuan ngasika Allah Taala, semua utai nadai nama-nama,

¹³tang sida ke jai enda ulih mujur. Pengidup sida baka ayuk, lalu sida deka mati biak, laban sida enda ngasika Allah Taala.”

¹⁴Tang nya jaku mapap. Peda nuan utai ti nyadi di dunya tu: kadang-kadang orang ke lurus bulih ukum ti patut diterima orang ke jai, lalu orang ke jai bulih upah ti patut diterima orang ke lurus. Aku madahka ngagai nuan, utai tu sigi nadai guna.

¹⁵Nya alai, dalam penemu aku, kitai patut ngelantangka diri, laban dalam pengidup kitai tu, kitai semina ulih ngelantangka diri ngena pengawa bepakai enggau beirupka utai. Abis kurang iya, kitai ulih ngereja utai nya lebuh kitai bebendar gawa dalam pengidup ti udah diberi Allah Taala ngagai kitai di dunya tu.

¹⁶Genap kali aku nguji nyadi orang ke bepenemu-dalam, lalu meratika utai ti nyadi di dunya tu, aku nemu kitai ulih natka diri enda tinduk siang malam

¹⁷tang kitai enda ulih meretika utai ti dikereja Allah Taala. Taja pen kitai bebendar nguji, tang enda meh kitai ulih meretika utai nya. Orang ke bepenemu-dalam nyangka ngumbai diri nemu, tang sida enda.