Read Iban Bup Pengajar 9 Bible Online

Bup Pengajar 9 - Iban bible

Bup Pengajar 9

¹Aku lama udah belematika semua utai tu, lalu aku nemu, Allah Taala empu ke ngatur semua utai ti dikereja orang ke bepenemu-dalam, enggau orang ke lurus, nyengkaum pengerindu enggau pemenchi sida. Nadai orang nemu utai ti deka nyadi jemah ila,

²tang nya nadai ngawa.[9] Orang ke lurus enggau orang ke bepenyalah, orang ke badas enggau orang ke jai, orang ke arap enggau orang ke enda arap, orang ke ngenjuk piring enggau orang ke enda ngenjuk piring, endang saum pengujung magang. Orang ke badas enda lebih badas agi ari orang ke bedosa. Lalu orang ke nyumpah enda lebih badas agi ari orang ke enda nyumpah.

³Pengujung siti nya aja nuntung semua mensia. Tu meh utai ti pengabis jai nyadi di dunya tu. Seagi-agi mensia idup, runding sida penuh laban penyai enggau penemu ti enda menuku, lalu udah nya sida mati ngenyit.

⁴Tang barang sapa idup dalam dunya orang ke idup tu, bisi pengadang. Indah ukui ti idup deh nyamai agi diau, ari singa ti mati.

⁵Sigi amat, orang ke idup nemu diri deka mati, tang orang ke mati nadai nemu utai. Sida nadai agi upah dianti. Sida enda dikingatka agi.

⁶Pengerindu sida, pemenchi sida, pengingin sida, semua dibai sida mati. Sida nadai agi enggau orang ngereja utai di dunya tu.

⁷Empa meh pemakai nuan, lalu ngelantangka diri. Irup meh wain nuan, lalu gaga ati. Utai nya nadai ngawa Allah Taala.

⁸Seruran pandangka mua ti lantang sereta gaga.

⁹Diau lantang ati enggau orang ke dikerinduka nuan seagi nuan idup dalam pengidup ti nadai guna tu, ti udah diberi Allah Taala ngagai nuan di dunya tu. Awakka nuan ngelantangka diri tiap hari ba hari ti nadai guna tu, laban semina nya aja utai ti ulih nuan ari pengiruh nuan.

¹⁰Kereja enggau bebendar sebarang pengawa ti dikereja nuan, laban di dunya pemati ila endang nadai pengawa, nadai runding, nadai penemu, nadai penemu-dalam. Kia ke meh nuan deka mupuk.

¹¹Aku bisi udah tetemuka siti agi utai, iya nya, orang ke laju belanda di dunya tu enda selalu menang belumba, lalu orang ke berani enda selalu menang beperang. Orang ke bepenemu-dalam enda selalu bulih pengidup, orang ke nemu berunding enda selalu nyadi kaya, lalu orang ke nemu ngereja utai enda selalu niki pangkat, laban utai ti jai endang tau nyadi ba genap iku orang.

¹²Nadai nuan nemu maya diri deka ditinggang penusah. Baka burung ti ngenyit disintak panjuk, baka ikan ti dibalut pukat, baka nya meh kitai mensia deka ditinggang penusah lebuh kitai enda ngadang.

¹³Aku bisi mega udah meda utai bukai, iya nya teladan ti manah pasal jalai mensia berundingka penemu-dalam di dunya tu.

¹⁴Bisi sebuah nengeri ti mit, ti nadai mayuh orang. Siku raja ti kering nyerang nengeri nya. Iya ngelulung nengeri nya, lalu sedia deka mumbuska dinding kuta nengeri nya.

¹⁵Di nengeri nya bisi siku orang ke seranta, tang pintar, ke ulih nyelamatka nengeri nya. Tang nadai orang ingatka iya.[10]

¹⁶Aku endang selalu ngumbai penemu-dalam nya manah agi ari pengering, tang orang nadai kala ngumbai orang ke seranta nya orang ke bepenemu-dalam, tauka mendingka utai ti disebut iya.

¹⁷Manah agi mendingka siku orang ke bepenemu-dalam bejaku enggau nyawa ti enda inggar, ari ke mendingka siku orang perintah bejaku enggau nyawa ti inggar ba aum bala orang ke beli.

¹⁸Penemu-dalam beguna agi ari senyata, tang siku orang ke bedosa ulih ngerusak utai ti manah.