Read Iban Pelandai Solomon 1 Bible Online

Pelandai Solomon 1 - Iban bible

Pelandai Solomon 1

¹ Pelandai ti pemadu manah, ulih Solomon.[1]

²Mulut nuan nyium aku. Pengerindu nuan manah agi ari wain.

³Nuan ngaba bau rengut. Nama nuan madahka nya. Nadai indu ulih nagang diri rinduka nuan.

⁴Bai aku enggau nuan, lalu tua deka rari. Awakka nuan meh nyadi raja aku, lalu mai aku ngagai bilik nuan. Tua deka lantang begulai bebendar ngirup, lalu rinduka pangan diri. Diatu baru aku nemu kebuah semua indu rinduka nuan!

⁵Indu Jerusalem, aku amat chelum tang[2] bajik, chelum baka langkau kain Kedar, tang bajik baka kain tirai ti di istana Solomon.

⁶Anang ngemaruhka aku ketegal chura kulit aku, laban mata hari udah ngasuh kulit aku chelum. Bala menyadi lelaki aku ringat ngagai aku lalu mejalka aku gawa dalam kebun anggur, datai ke aku nyau nadai hari ngintu tubuh diri empu.

⁷Padahka ngagai aku, O ambai, ngagai ni nuan deka nguluka raban bedus nuan ngulam? Ngagai ni alai sida deka ngerarika diri ari panchar mata panas lebuh tengah hari? Nama kebuah aku enda tau enda begigaka nuan ba raban bedus orang bukai?[3]

⁸Kati nuan enda nemu endur alai nya, nuan indu ke pemadu bajik? Mupuk meh nuan, lalu titihka raban bedus nya. Giga padang rumput ke raban kambin nuan semak langkau kain bala pengibun bedus.

⁹Nuan, ambai, nyau ngasuh lelaki gila laban pengingin baka kuda ti indu ke ngasuh kuda ti lelaki ti narit kerita raja Ejip nyau gila laban pengingin.

¹⁰Buk nuan manah gaya mungkur kuyu nuan lalu merundai ba rekung nuan baka batu ti berega.

¹¹Tang kami deka ngaga ke nuan rantai emas ti diias enggau pirak.

¹²Lebuh raja aku benung gali ba kerusi-panjai iya, lalu minyak wangi aku ngaba bau rengut.

¹³Ambai aku bebau mur lebuh iya ningkapka diri ba tusu aku.

¹⁴Ambai aku baka bungai babas ti bebungai dalam kebun anggur di En-gedi.

¹⁵Naka meh pemajik nuan, O ambai. Mata nuan jelik-jelik laban pengerindu!

¹⁶Naka meh penyigat gamal nuan, O sulu aku. Nuan ngasuh ati aku udu gaga! Rumput ti gadung tu meh nyadika peninduk tua.

¹⁷Kayu sidar deka nyadika tiang rumah tua, lalu kayu saipris deka nyadika atap rumah tua.