Read Iban Pelandai Solomon 2 Bible Online

Pelandai Solomon 2 - Iban bible

Pelandai Solomon 2

¹Aku tu bungai ros di Saron, bungai bakung ti ba lebak.

²Baka bungai bakung ti tumbuh ba madang duri, baka nya meh ambai aku begulai enggau indu bukai.

³Baka kayu epal ti tumbuh dalam babas, baka nya meh ambai aku dibandingka enggau lelaki bukai. Aku rindu duduk belindung ba iya, lalu buah iya manis diempa.

⁴Iya mai aku ngagai balai pengerami makai besai lalu nuatka menira pengerindu atas aku.

⁵Keringka aku baru ngena salai buah anggur lalu asuh aku badu agi aus ngena buah epal! Aku nyau lembut tulang laban aku balat tetengukka iya.

⁶Jari kiba iya di baruh pala aku, lalu jari kanan iya murus aku.

⁷Besemaya ngagai aku, kita indu Jerusalem. Besumpah meh kita atas rusa ti laju, enggau kijang madahka diri enda ngachau kami duai lebuh kami duai benung rinduka pangan.

⁸Aku bisi ninga nyawa ambai aku. Iya datai belanda nengah bukit, belanda nengah munggu mansang ngagai aku.

⁹Ambai aku baka kijang, baka anak rusa ti lelaki. Nyin iya bediri ngimbai dinding. Iya nilik ke dalam ari jenila lalu nyeling ngerampas ari seling dinding.

¹⁰Ambai aku bejaku enggau aku. Datai kitu, ambai aku. O sulu, aram mupuk enggau aku.

¹¹Musin chelap nyau abis. Ujan udah badu.

¹²Di menua pesisir, bungai nyau ngerembai. Tu meh maya belagu. Lalu munyi burung achang bisi didinga di padang.

¹³Buah ara nyau deka mansau. Angin nyau bebau rengut laban bau bungai anggur. Nya alai, datai meh nuan ambai. Sulu, aram mupuk enggau aku.

¹⁴Nuan baka burung achang ti belalai ba selikap batu. Awakka aku meda pemajik mua nuan lalu ninga munyi pemanah nyawa nuan.

¹⁵Tangkap jelu munsang, enggau anak sida sebedau sida ngerusak kebun anggur kitai ti benung bebungai.

¹⁶Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung

¹⁷datai ke ribut muput pagi hari lalu hari enda agi petang. Pulai kitu, sulu, baka kijang, baka anak rusa ti lelaki ba bukit Beter.[4]