Read Iban Pelandai Solomon 4 Bible Online

Pelandai Solomon 4 - Iban bible

Pelandai Solomon 4

¹Naka meh pemajik nuan, O ambai aku! Mata nuan nyau beperenching laban pengerindu merening ari belakang tambai mua nuan. Buk nuan kepai-kepai baka raban kambin ti belanda nurun bukit Giliat.

²Ngeli nuan burak baka jelu bedus ti baru udah dikukur sereta diberi mandi. Sigi pen nadai ga ngeli nuan rabang. Semua ngeli nuan nadai timpang.

³Mulut nuan baka kain ti mirah-redam. Naka meh pemanah mulut nuan lebuh nuan bejaku. Kuyu nuan nyau pelu-pelu dibap tambai mua nuan.

⁴Rekung nuan baka menara David, segala sereta alus,[5] lalu tenggak baka seribu iti terabai ba rekung nuan.

⁵Tusu nuan baka kijang, rusa ti besapit ti ngulam ba madang bungai bakung.

⁶Aku deka majak diau ba bukit mur, ba bukit menyan, datai ngagai maya ribut muput pagi hari lalu hari enda agi petang.

⁷Naka meh pemajik nuan, O ambai aku! Naka meh pemajik nuan!

⁸Aram mupuk enggau aku ari Bukit Lebanon, O bini. Mupuk enggau aku ari menua Lebanon. Nurun ari tuchung Bukit Amana, ari Bukit Senir enggau Bukit Hermon, alai singa enggau engkuli diau.

⁹Jelik mata nuan, O ambai enggau bini aku, enggau tenggak ti dikena nuan udah ngasuh ati aku balat berai.

¹⁰Pengerindu nuan ngasuh ati aku gaga, O ambai enggau bini aku. Pengerindu nuan manah agi ari wain. Minyak wangi nuan lebih agi bebau rengut ari rempah.

¹¹Mulut nuan manis asai ai manyi, O sulu aku. Dilah nuan asai ai tusu enggau ai manyi. Gari nuan bebau rengut baka Bukit Lebanon.

¹²Ambai aku, bini aku, nya kebun ti resia, kebun ti dipagar, mata ai ti diempu aku siku aja.

¹³Dia meh endur alai utai ti ditanam tumbuh enggau galak. Sida tumbuh baka kebun buah delima lalu mansutka buah ti pemadu manah. Bungai inai enggau kayu rempah,

¹⁴kunyit, tebu, kayu manis, enggau semua macham menyan bisi dia magang. Kayu mur enggau garu bisi tumbuh dia sama enggau semua kayu rempah ti pemadu bebau rengut.

¹⁵Ai ti engkeching sungai ti rarat, anak sungai ti pansut ari Bukit Lebanon mai ai ngagai kebun nya.

¹⁶Dani meh nuan, Ribut Utara. Ribut Selatan, puputka kebun aku. Awakka angin ngaba bau rengut. Awakka ambai aku datai ngagai kebun tu lalu makai buah ti pemadu manah ari kebun tu.