Read Iban Pelandai Solomon 5 Bible Online

Pelandai Solomon 5 - Iban bible

Pelandai Solomon 5

¹Aku udah tama ngagai kebun aku, O ambai enggau bini aku. Aku benung ngumpul rempah enggau mur aku. Aku benung makai ai manyi enggau idang manyi. Aku benung ngirup wain enggau ai tusu. Makai meh kita, O bala ambai, lalu ngirup datai ke kita nyau mabuk laban pengerindu!

²Lebuh aku tinduk, ati aku mengkang dani. Aku bemimpi ninga ambai aku nekung pintu. Awakka aku tama, O wai sulu ambai aku, burung achang aku. Pala aku nyau basah laban ambun, lalu buk aku nyau basah laban bias ujan.

³Aku baru udah muka gari aku, nya alai nama kebuah aku enda tau enda begari baru? Aku udah masu kaki aku, nya alai nama kebuah aku enda tau enda ngamahka kaki aku baru?

⁴Ambai aku megai pintu, lalu ati aku gaga laban iya nyau semak.

⁵Aku sedia deka ngasuh iya tama. Jari aku dibalut mur tunjuk aku dibalut ai mur, lebuh aku megai gagang pintu.

⁶Aku muka pintu ke ambai aku, tang iya udah nadai agi dia. Naka meh pengingin aku deka ninga nyawa iya! Aku ngiga iya, tang nadai tetemuka iya. Aku ngangauka iya, tang nadai ninga iya nyaut.

⁷Orang ke nyaga nengeri tetemuka aku. Sida malu aku, lalu tubuh aku rajai. Bala jejaga ke ba kuta nengeri ngerampas tungguk pala aku.

⁸Besemaya meh kita enggau aku, kita indu Jerusalem, enti kita tetemuka ambai aku, padahka ngagai iya, aku nyau lembut tulang inginka iya.

⁹Nuan indu ke pemadu bajik, kati ambai nuan lain agi ari semua orang bukai? Nama utai ti manah ba iya ti ngasuh kami patut besemaya enggau nuan?

¹⁰Ambai aku sigat sereta kering. Ari sepuluh ribu iku lelaki, ka semina siku aja ti baka iya.

¹¹Mua iya baka emas tulin, lalu buk iya ngelegetang, chelum baka bulu burung kak.

¹²Mata iya manah baka burung achang ti ba tebing sungai, burung achang ti dibasu ngena ai tusu, ti bediri ba tebing sungai.[6]

¹³Kuyu iya manah baka kebun ti penuh laban sayur enggau rempah. Mulut iya baka bungai bakung, basah laban ai mur.

¹⁴Jari iya manah raras, lalu iya ngena tinchin ti nyangkum batu ti berega. Tubuh iya baka gading ti alus,[7] ti nyangkum batu nilam.

¹⁵Pah iya baka tiang batu marmar ti burak ti diengkah dalam sangkum emas. Iya baka raja, baka Bukit Lebanon ti ngundan kayu sidar ti tinggi.

¹⁶Mulut iya manis disium. Semua utai ba iya narit ati aku magang. Nya meh gaya ambai aku, indu Jerusalem.