Read Iban Pelandai Solomon 6 Bible Online

Pelandai Solomon 6 - Iban bible

Pelandai Solomon 6

¹Indu ke pemadu bajik, kini ke tunga ambai nuan bejalai? Padahka ngagai kami kini ke ambai nuan bejalai, ngambika kami ulih nulung nuan ngiga iya.

²Ambai aku udah bejalai ngagai kebun iya, alai kayu balsam ti tumbuh. Iya meri raban jelu tupi iya makai ba kebun nya lalu ngumpul bungai bakung.

³Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung.

⁴Ambai aku, nuan bajik baka Jerusalem, manah baka nengeri Tirsah, manah baka nengeri ti besai.

⁵Anang malik ngagai aku, laban perening nuan ngasuh aku lemi. Buk nuan kepai-kepai baka raban kambin ti belanda nurun bukit di Giliat.

⁶Ngeli nuan burak baka raban bedus ti udah diberi mandi. Sigi pen nadai ga ngeli nuan rabang. Semua ngeli nuan nadai timpang.

⁷Kuyu nuan pelu-pelu di belakang tambai mua nuan.

⁸Awakka raja bisi enam puluh iku kuin, lapan puluh iku indu simpan, indu ke biak ti enda ulih diitung!

⁹Tang aku rinduka siku indu aja, lalu iya bajik baka burung achang. Iya anak tunggal indai iya, anak ke dikerinduka indai iya. Semua indu bela merening ngagai iya magang, lalu muji iya. Kuin enggau indu simpan belagu muji iya.

¹⁰Sapa orang tu ke nyeling baka merekah pajar? Iya bajik sereta terang mua, beperenching baka mata hari tauka baka bulan.[8]

¹¹Aku udah datai ba madang kayu almon deka meda anak kayu ba lebak nya, deka meda daun ti muda ba batang anggur enggau bungai ba kayu delima.

¹²Aku getar-getar laban nuan udah ngasuh aku balat gagit ati deka rindu baka orang ke nepan kerita perang ke ransing deka beperang.[9]

¹³Betanda, betanda,[10] meh nuan indu dara orang Sulam. Awakka kami meda nuan betanda. Nama kebuah kita keran deka meda aku betanda ba entara rintai orang ke ngemata?