Read Iban Pelandai Solomon 7 Bible Online

Pelandai Solomon 7 - Iban bible

Pelandai Solomon 7

¹Naka meh pemanah gaya kaki nuan bekasut, O indu ke udu bajik! Pah nuan baka batu ti berega ti ditempa orang ke landik engkebang.

²Pusat nuan baka mangkuk ti nadai kala enda ngundan wain ti udah dichampur. Perut nuan baka tugung gandum ti dikelingi bungai bakung.

³Tusu nuan baka dua iku anak rusa, baka dua iku kijang.

⁴Rekung nuan baka menara ti digaga ari gading. Mata nuan baka letung ti di nengeri Hesbon, semak pintu Batrabim. Idung nuan baka menara Lebanon ti ngayung nengeri Damaskus.

⁵Pala nuan baka Bukit Karmel lalu buk nuan kepai-kepai baka kain ungu ti narit ati raja.

⁶Naka meh pemanah enggau pemajik gamal nuan O ambai ke pemadu bajik!

⁷Raras tubuh nuan manah baka batang kayu engkerema, lalu tusu nuan baka tangkai buah iya.

⁸Aku deka niki kayu engkerema nya lalu ngambi buah iya. Dipeda aku tusu nuan baka tangkai buah anggur, lalu kesuh seput nuan bebau rengut baka buah epal,

⁹lalu mulut nuan baka wain ti pemadu manah. Enti pia awakka wain nya rarat terus ngagai ambai aku, rarat ngagai mulut enggau ngeli iya.[11]

¹⁰Aku endang enggi ambai aku, lalu iya endang inginka aku.

¹¹Datai kitu meh nuan O sulu aku. Aram tua mupuk ngagai menua pesisir lalu bemalam ba sebelah genturung pendiau.[12]

¹²Tua deka dani tumu pagi lalu meresa batang anggur, deka meda enti sida udah belabuh bekantuk deka meda enti bungai anggur udah ngerembai lalu kayu delima udah bebungai. Dia ila baru aku deka ngayanka pengerindu aku ke nuan.

¹³Nuan ulih ensium bau jayau, lalu semua buah ti manah bisi semak mua pintu tua. O wai sulu, aku udah nyimpan ke nuan pengerindu ti lama enggau pengerindu ti baru.