Read Iban Pelandai Solomon 8 Bible Online

Pelandai Solomon 8 - Iban bible

Pelandai Solomon 8

¹Naka meh pemanah enti sema nuan tak menyadi lelaki aku, ti udah ditusuka indai aku. Nya baru, enti aku betemu enggau nuan ba jalai raya, aku ulih nyium nuan, lalu nadai orang deka ibuhka nya.

²Aku deka mai nuan ngagai rumah indai aku, alai nuan tau ngajar aku pasal pengerindu. Aku deka meri ngagai nuan wain ti udah dirempah, wain ti digaga ari buah delima, ngambika bisi diirup nuan.

³Jari kiba nuan di baruh pala aku, lalu jari kanan nuan murus aku.

⁴Besemaya meh kita enggau aku, kita indu Jerusalem, madahka diri enggai ngachau lebuh kami duai benung rinduka pangan diri.

⁵Sapa orang nya ke datai ari menua puang, bepegai jari enggau ambai iya? Aku ngerak nuan di baruh pun kayu epal, ba endur alai nuan ke ada.

⁶Anang rinduka orang bukai tang semina siku aku aja. Anang merap orang bukai, tang semina aku siku aja. Pengerindu endang bekuasa baka pemati. Pengingin bekuasa baka pemati. Iya mau lalu ngangus baka daun api.

⁷Ai enda ulih madamka iya. Ai bah enda ulih ngelamun iya. Tang enti orang nguji meli pengerindu ngena pengaya sida, sida deka dikeleseka orang.

⁸Kami bisi siku menyadi indu ke agi biak, ti agi mit tusu. Kati ku kami enggau iya lebuh orang ke bujang datai ngagai iya?

⁹Enti sema iya nya dinding kami deka ngaga ke iya siti menara ari pirak. Tang enti sema iya nya pintu ti besai, kami deka nyaga iya ngena papan kayu sidar.

¹⁰Aku tu dinding, lalu tusu aku menara iya. Ambai aku nemu, lebuh aku begulai enggau iya aku puas ati sereta bisi pemaik.

¹¹Solomon bisi sebidang kebun anggur ba endur siti ti dikumbai Baal Hamon. Bala orang bumai nyua kebun nya ari iya. Genap iku sida mayar seribu singkap duit pirak.

¹²Solomon nerima seribu singkap duit iya, lalu bala orang bumai bulih dua ratus singkap nyadika ungkup sida. Aku endang bisi kebun anggur aku empu!

¹³Awakka aku ninga munyi nyawa nuan ari kebun nya, O ambai. Bala pangan aku nganti, keran deka ninga nuan bejaku.

¹⁴Datai ngagai aku, O ambai, baka kijang, baka anak rusa lelaki ba bukit ti endur alai kayu rempah tumbuh.