Read Iban Penemu-Dalam Solomon 10 Bible Online

Penemu-Dalam Solomon 10 - Iban bible

Penemu-Dalam Solomon 10

¹Penemu-dalam nyaga apai dunya. Lebuh maya nya semina iya siku aja udah digaga. Penemu-dalam ngelepaska Adam ari penyalah iya,

²lalu meri Adam pengering merintah semua utai.

³Lebuh maya nya siku orang ti enda lurus ngelengkaka Penemu-dalam; iya ngerusak diri empu ketegal iya munuh menyadi iya maya ringat amat.

⁴Ketegal penyalah nya, dunya ampuh bah tang Penemu-dalam ngidupka iya baru. Iya ngiring siku orang ke lurus dalam bandung.

⁵Bisi sekali lebuh semua bansa ke saati enggau pangan diri ngereja penyai nyau charut, Penemu-dalam tetemuka siku orang ke lurus lalu ngibun iya ngambika iya nadai penyalah dimua Allah Taala. Iya meri Abraham pengering ngambika iya ngasika asuh Allah Taala, taja pen iya balat sayauka anak iya.

⁶Penemu-dalam nyelamatka siku orang ke lurus, benung orang ke nadai pengarap ke Allah Taala parai. Iya ngerarika diri ari api ti ngerusak lima buah nengeri.

⁷Kita agi ulih meda tanda penyai sida. Tanah dia kusi sereta berasap. Buah kayu dia nadai kala mansau, lalu dia bisi tiang batu garam ti tanda orang siku ke enda arap.

⁸Orang di nengeri nya enda bedulika Penemu-dalam lalu sida enda ngelala bagi utai ti ngena ari utai ti salah. Ukai semina nya aja, indah bekau tembawai nengeri dia deh nyadika pengingat kitai pasal ulah sida ti enda manah, ngambika penyilap sida meruan dikingatka belama.

⁹Tang Penemu-dalam ngelepaska nembiak iya ari pengerusak nya.

¹⁰Bisi siku orang lurus rari ari pengeringat menyadi iya. Penemu-dalam lalu ngiring iya ngagai jalai ti betul. Penemu-dalam mandang ngagai iya pasal perintah Allah Taala, lalu ngasuh iya nemu utai ti kudus. Penemu-dalam ngasuh iya kaya sereta mujur dalam pengawa iya.

¹¹Lebuh orang bukai majak amu ke reta iya, lalu deka ngambi reta nya ari iya, dia Penemu-dalam nanahka iya lalu ngasuh iya kaya.

¹²Penemu-dalam nyaga iya ari munsuh ke nganti peluang nyamah iya. Penemu-dalam ngasuh iya menang lebuh sida bendar amat belaban ngambika iya nemu nadai utai bukai ulih ngasuh orang kering kelimpah ari ti ngereja pengawa Allah Taala.

¹³Bisi sekali siku orang lurus dijual nyadi ulun, tang Penemu-dalam enda ngelengkaka iya. Penemu-dalam nyaga iya likun ari penyalah. Penemu-dalam bisi enggau iya dalam jil,

¹⁴lalu enda kala ninggalka iya, nyentuk ngagai maya Penemu-dalam meri iya kuasa megai menua, lalu ngasuh iya nyadi tuai orang ti nekanka iya. Penemu-dalam ngasuh pengawa orang ti betenah ngelaban iya ditemu orang, lalu Penemu-dalam meri ngagai iya basa ti meruan belama.

¹⁵Bisi sekali Penemu-dalam ngelepaska orang ke nadai penyalah sereta kudus ari bansa ke ngenyakka sida.

¹⁶Penemu-dalam masuk semengat siku nembiak Allah Taala, lalu ngelaban sida raja ti jai ngena mayuh kereja ajih.

¹⁷Penemu-dalam ngupah bala nembiak Allah Taala ketegal pemerinsa sida. Iya nguluka sida nengah jalai ti nyelai. Iya ngelindung sida lebuh siang hari, lalu meri sida penampak baka api lebuh malam.

¹⁸Iya nguluka sida nengah ai ti dalam ba Tasik Merah,

¹⁹tang iya ngelemaska bala munsuh sida, lalu ngalunka bangkai sida nya ngagai tebing.

²⁰Lalu sida ke lurus ngerampas keresa orang ti enda arap ke Allah Taala. Sida belagu muji nama Nuan ti kudus, O Tuhan. Sida sertai muji Nuan laban Nuan udah nyaga sida.

²¹Penemu-dalam ngasuh orang ke bisu nemu bejaku, nyentukka anak mit ulih bejaku enggau terang.