Read Iban Penemu-Dalam Solomon 12 Bible Online

Penemu-Dalam Solomon 12 - Iban bible

Penemu-Dalam Solomon 12

¹Roh Nuan ti meruan belama iya endang bisi ba genap iku mensia,

²nya alai Nuan bejimat ngerara sida ke bedosa ngelaban Nuan. Nuan ngasuh sida ingatka ulah ti dikereja sida, lalu nangkan sida pasal utai nya, ngambika sida ngelengkaka jalai sida ti jai lalu nyerahka pengarap sida ngagai Nuan, Tuhan.

³Nuan begedika orang ke diau di menua kudus Nuan dulu menya, ketegal sida ngereja penyai; sida ngereja pengawa engkeramat sereta nyembah utai ti enda kudus.

⁵Sida munuh anak mit enggau nadai pengasih, lalu makai isi enggau darah mensia. Sida belalai ngereja pengawa meri genselan,

⁶lebuh apai indai munuh anak sida empu ke enda ulih ngelaban. Nya alai endang ari peneka Nuan aki ini kami munaska sida,

⁷ngambika menua ti dikira Nuan pengabis manah nya nyadika menua endur nembiak Nuan diau.

⁸Tang taja pia, agi meh Nuan mandangka pengasih Nuan ngagai munsuh sida laban orang nya mensia mega. Nuan ngirumka indu gamang dulu agi ari bala soldadu Nuan ngambika ngerusak bala munsuh belubah-lubah.

⁹Nuan endang ulih ngasuh orang ke lurus ngerusak bala orang ke nadai pengarap nya enggau jalai perang; Nuan endang ulih munaska sida tekala nya enggau jelu mangah tauka enggau jaku kasar aja.

¹⁰Tang kena nganti nya, Nuan bejalaika ukum Nuan belubah-lubah, laban Nuan meri sida peluang ngesal ati, taja Nuan endang nemu sida nya peturun orang ke jai, laban sida endang jai kenyau ari ada, lalu sida nya endang enggai ngubah jalai sida berunding.

¹¹Semua bansa sida nya kena sumpah kenyau ari pun, lalu taja Nuan enda ngukum sida ketegal penyalah sida, ukai reti nya Nuan takutka sapa-sapa.

¹²Nuan ke ngaga sida nya. Nadai siku orang tau bejaku ngeringka sida tauka nyalah Nuan ngerusak sida ketegal penyai sida. Nadai siku orang tau nanya nama utai ti udah dikereja Nuan, tauka ulih nyakal pemutus penemu Nuan.

¹³Semua utai dipegai Nuan magang, lalu nadai petara bukai endur Nuan patut madahka pemutus penemu Nuan.

¹⁴Nadai raja tauka orang ke bekuasa tau ngumbai Nuan ngukum orang enggau nadai pematut.

¹⁵Nuan endang pengelurus, lalu Nuan merintah genap utai enggau betul. Nuan nadai kala ngena kuasa Nuan kena ngukum orang ke enda patut diukum.

¹⁶Pengering Nuan nyadika pun pengelurus. Nuan ulih mandangka pengasih Nuan ngagai genap iku orang, laban Nuan endang Allah Taala ke semua mensia.

¹⁷Nuan ngayanka pengering Nuan maya orang bisi kakang ati pasal kuasa Nuan ti pemadu besai, lalu Nuan ngukum sebarang orang ke nemu kuasa Nuan, tang sida berani enda pedulika kuasa nya.

¹⁸Taja Nuan bisi penuh kuasa, Nuan endang akim ke bisi pengasih. Nuan tau ngukum kami sebarang maya peneka Nuan, tang Nuan enda; Nuan merintah kami enggau pengambis pengeliat ati.

¹⁹Ari utai ti udah dikereja Nuan, Nuan udah ngajar nembiak Nuan pasal orang lurus ti mesti mentas mega. Nuan udah meri ngagai nembiak Nuan pengandal ti besai ngena jalai ti ngasuh sida ngesal ati ke penyalah sida.

²⁰Nuan bejimat amat sereta liat ati lebuh ngukum munsuh nembiak Nuan: taja sida nya patut mati, agi meh Nuan meri sida peluang ngambika sida badu nengah jalai ti bepenyalah.

²¹Tang Nuan terit amat ngakim bala nembiak Nuan empu, taja Nuan udah ngaga sempekat enggau aki ini sida, lalu udah beamat-amat besemaya deka meri sida utai ti manah.

²²Endang amat, Nuan ngukum kami, tang Nuan ngukum munsuh kami lebih beribu kali lipat, kebuah pia ngambika maya kami ngukum orang bukai, kami tau ingatka pemadas Nuan, lalu lebuh kami diakim, kami ulih minta kasih.

²³Nya alai Nuan balat merinsaka orang ke beli idup dalam penyai. Nuan merinsaka sida ngena utai ti disembah sida.

²⁴Sida tekelalu jauh limpang ari pemendar lalu nyembah utai ngapa baka jelu. Indah munsuh sida deh enda nyembah jelu nya. Sida nya muntang amat ditipu baka anak mit.

²⁵Nya alai Nuan ngukum sida ketegal pemeli sida empu, lalu ukum Nuan ngasuh sida baka orang ke beli amat.

²⁶Ukum nya lempung, tang orang ke enda pedulika iya deka ngasaika penuh pemerat ukum nya ari Allah Taala.

²⁷Lebuh sida diukum ngena jelu ti dikumbai sida petara, sida nyau pedis amat ati charut runding lalu ngelala Allah Taala ke bendar, sigi Iya ke semampai dikenggai sereta enda diterima sida. Nya alai sida merinsa kena ukum ti penudi amat.