Read Iban Penemu-Dalam Solomon 13 Bible Online

Penemu-Dalam Solomon 13 - Iban bible

Penemu-Dalam Solomon 13

¹Barang sapa enda nemu Allah Taala endang amat beli. Orang ke baka nya merening utai ti manah ngelingi sida, tang sida enda meda Allah Taala ti idup. Sida belajar pasal utai ti digaga Iya, tang sida mengkang enda ngelala Iya ti ngaga utai nya.

²Runding sida ke bukai, lalu ngumbai utai nya bekuasa di dunya, baka api tauka ribut, tauka kudi, tauka bintang, tauka ai ti deras, tauka bulan enggau mata panas di langit.

³Mensia gaga amat ati meda pemanah utai nya, lalu ngumbai utai nya petara, tang sida patut nemu semua utai nya bisi siku tuan, lalu tuan nya jauh besai kuasa ari semua utai nya, laban Iya ke ngaga pemanah semua utai nya ti digaga Iya.

⁴Laban orang alit ati meda kuasa enggau gaya pejalai utai nya, nya alai ari nya sida patut belajar lalu nemu Iya ti ngaga utai nya lebih jauh besai kuasa.

⁵Lebuh kitai nemu pemesai enggau pemanah utai ti digaga Iya, kitai mega belajar pasal Iya ti ngaga semua utai nya.

⁶Nyangka kitai tekelalu balat nyalah sida nya. Dalam semua nya, kada sida enda amat ngiga Allah Taala, tang enda ulih.

⁷Laban sida dikelinggi utai digaga Allah Taala, sida majak merening utai nya, dataika sida mutus ati ngumbai utai nya petara laban utai ti dipeda sida bangat tekelalu manah.

⁸Tang, taja pia, agi meh sida enda chukup kedalih.

⁹Enti sida bisi pikir enggau chukup pasal utai di bap langit, nama kebuah sida enda kala tetemuka Tuhan ti ngaga semua utai nya?

¹⁰Tang orang ke pengabis merinsa, iya nya, orang ke arap ke utai ti enda idup, baka orang ke nyembah utai ti digaga jari mensia - utai nya baka patung jelu ti digaga manah-manah ari mas tauka pirak, tauka sekeda batu ti enda beguna digaga orang dulu kelia.

¹¹Bisi tukang ke landik nyayat kayu ti manah, muai kulit iya, udah nya, bejimat ngena pengelandik jari iya, ngaga ari kayu nya utai ti tau diguna.

¹²Nyadi uras kayu nya digumpul ke kayu api kena iya manduk pemakai ti diempa iya duduk enggau ati lantang.

¹³Ari laluh kayu nya tadi nyangka tukang nya bisi tetemuka siti papung ti nadai guna - nyangka papung nya belingkuk liuk - lalu lebuh maya lantang iya belubah-lubah mupuk ngaga papung kayu nya baka gamal mensia.

¹⁴Tauka digaga baka gamal jelu ti nadai guna. Iya ngechat patung nya mirah enggau silik.

¹⁵Udah nya iya ngelekatka patung nya ba dinding mantang iya enggau paku lawang besi.

¹⁶Iya bejimat ngelekatka patung nya ngambika iya enda labuh, laban iya nemu utai nya semina patung engkeramba lalu begunaka tulung; iya enda ulih nulung diri empu.

¹⁷Tang iya enda malu besembiang ngagai patung engkeramba ti nadai seput nya, pasal pekara melaki-bini iya, pasal bala anak iya, enggau pasal reta tengkira iya.

¹⁸Engkeramba nya nadai pengering, tang orang nya besembiang minta pengerai ari engkeramba nya. Engkeramba nya ukai utai ti idup, tang orang nya besembiang minta umur panjai ari engkeramba nya. Engkeramba nya nadai peneleba, tang orang nya minta tulung ari utai nya. Engkeramba nya enda nemu bejalai, tang orang nya minta engkeramba nya ngasuh pejalai iya mujur.

¹⁹Jari engkeramba nya nadai kuasa, tang orang nya minta engkeramba nya nulung iya - baka pengawa dagang, ngiga duit enggau mayuh macham kereja iya ti bukai.