Read Iban Penemu-Dalam Solomon 14 Bible Online

Penemu-Dalam Solomon 14 - Iban bible

Penemu-Dalam Solomon 14

¹Baka nya mega, orang ke nyediaka diri deka belayar ke tasik ti begelumbang minta tulung ari repik kayu ti enda sama pengering enggau kapal ti deka ditepan iya.

²Sekeda orang ngaga plan kapal laban deka ngiga untung, lalu tukang ngaga kapal nya enggau naka pengelandik.

³Tang, Nuan, O Apai, ti ngulingka iya; Nuan ngasuh pejalai iya selamat nengah gelumbang tasik.

⁴Orang ulih belayar ke tasik taja sida nadai pengelandik, laban Nuan nyaga sida ari penusah.

⁵Ari peneka Nuan semua utai ti digaga Nuan patut dikena. Nya alai orang ulih ngelayang tasik ngena perau lalu selamat sangkai di seberai, laban sida nyerahka nyawa sida ngagai kayu ti mit nya.

⁶Baka nya meh utai ti nyadi dulu menya, lebuh bansa orang ke sumbung ke besai gamal parai. Pengandal dunya rari ngena perau dalam ibun Nuan, lalu numbuhka rebak baru nampung mensia suba.

⁷Berekat nurun ba bandung kayu Noah ti nentuka pengelurus agi idup.

⁸Tang sumpah nurun ba engkeramba ti digaga jari mensia. Sumpah mega nurun ba orang ke ngaga engkeramba nya, ketegal iya ngaga utai ti tau dirusak, lalu udah nya ngumbai iya petara.

⁹Orang ke nadai pengarap enggau utai ti gaga ti enda tau dikarapka bela dipegedika Allah Taala,

¹⁰ke deka ngukum utai ti digaga enggau orang ke ngaga utai nya.

¹¹Nya meh ukum Allah Taala ti deka nurun ba engkeramba orang kapil laban, taja utai nya digaga ari utai ti digaga Allah Taala, tang utai ti jai nya ngerusak semengat orang ti beli.

¹²Maya engkeramba udah digaga dia pengawa seks ti salah lalu belabuh. Utai nya ngerusak pengidup mensia sekumbang iya digaga ari mula iya suba.

¹³Mula iya engkeramba endang nadai, lalu sida enda seruran bisi belama iya.

¹⁴Penyumbung mensia mai utai nya ke dunya tu, nya alai pengawa ti deka munaska iya enggau jampat udah diatur.

¹⁵Bisi sekali siku apai orang ke tusah ati amat ketegal anak iya parai biak, nya alai iya lalu ngaga patung baka gamal anak iya ke ngenyit diambi ari iya. Iya masa orang ke udah parai baka ke masa petara, lalu iya mai orang ke dipegai iya berami enggau iya.

¹⁶Nyau kelama pengawa nya nyadi adat sembah ngagai petara ngapa ti majak mansang kering sekering. Penudi iya pengawa nya nyadi adat, lalu engkeramba disembah nitihka asuh tuai ke bekuasa.

¹⁷Lebuh rayat tekelalu jauh ari raja ke deka dibasa sida betungga mua enggau iya, dia sida ke ingin amat deka masa iya ke nadai dia, ngaga gamal iya dalam ati sida, lalu ketegal nya sida ngaga gambar raja nya.

¹⁸Bala tukang lukis ke ngaga gambar nya numbuhka pengawa sembah nyengkaum sida ke enda nemu raja nya.

¹⁹Sekeda tukang lukis ke keran deka ngerinduka ati raja ngaga gambar iya lebih sigat ari gamar raja nya empu.

²⁰Laban orang nyau tetarik ati meda gambar nya, nya alai tuju sida ke deka masa iya nyau betukar ngagai pengawa ti nyembah iya.

²¹Pengujung iya semua pengawa nya nyadi panjuk ti mai pemati, laban orang ke tusah tauka merinsa diperintah raja, ngambi sebarang utai ari batu tauka kayu, lalu bebasaka utai nya baka ti bebasaka Allah Taala.

²²Sida ukai semina salah penemu pasal Allah Taala tang penemu ti salah nya ngujungka sida bemunsuh enggau pangan diri, lalu sida ngumbai pengawa nya pengelantang.

²³Sida munuh bala anak sida ti agi mit nyadika piring lalu ngintu sembah sida sereta nitihka adat ti nyelai lalu ngereja pengawa baka orang gila.

²⁴Sida nadai agi ngintu pendiau enggau menyana tauka ngintu pengawa melaki-bini enggau manah. Sida ke lelaki munuh pangan diri ketegal mungkir, tauka ketegal udu tusah ati laban ke sengaja butang enggau bini iya.

²⁵Semua utai charut amat laban udu bebunuhka pangan diri, nerumpak, nipu, makai suap, nadai penaluk ke diri melaki-bini, menua kachau amat, balat bula,

²⁶ngelaban orang ke nadai penyalah, nadai adat beterima kasih, rusak adat, penyai pengawa seks, pechah ruang bilik, butang enggau nadai pendiau ti menyana agi.

²⁷Pengawa nyembah engkeramba ti enda tau disebut nama, sigi pun enggau pengujung semua macham penyai.

²⁸Orang ke nyembah engkeramba enda ulih nagang diri empu deka ngiga penyamai, tauka deka bejaku bula ti dikumbai sida jaku tilit, tauka deka ngereja penyai, tauka deka kempang mungkir danji.

²⁹Sida berani besumpah nyebut jaku bula lalu ngumbai diri enda kena ukum, laban engkeramba ti dikarapka sida endang utai ti nadai seput.

³⁰Tang ukum endang tetap deka datai ba sida enggau dua iti kebuah: kesatu, sida endang amat salah pasal Allah Taala lebuh sida nyembah engkeramba, lalu kedua, sida nadai sekali-kali pedulika pengudus nya alai sida bejaku bula deka nipu orang.

³¹Lebuh orang ke jai ngaga penyalah, sida deka digiga, ukai ulih kuasa ti dikena sida besumpah, tang ulih ukum ti patut diterima orang ke bedosa.