Read Iban Penemu-Dalam Solomon 15 Bible Online

Penemu-Dalam Solomon 15 - Iban bible

Penemu-Dalam Solomon 15

¹Tang Nuan, Allah Taala kami, sigi manah, amat, sereta liat ati. Nuan megai dunya enggau pengasih.

²Taja kami bedosa, kami nemu kuasa Nuan, lalu agi enggi Nuan. Tang laban kami nemu diri endang enggi Nuan, kami deka badu bedosa.

³Nadai utai lebih lurus ari ti nemu Nuan, lalu ngelala kuasa Nuan nyadika pun pengidup belama iya.

⁴Kami enda kala dibai limpang ulih pengawa ti jai ari pengelandik mensia, ulih utai ti nadai guna dichat tukang lukis, tauka ulih engkeramba ti dichat ngena mayuh macham chura.

⁵Gamal utai ti baka nya ngangkatka ati orang ke beli, lalu ngasuh sida inginka gamal utai ti nadai seput.

⁶Sebarang sapa orang ke ngaga utai nya, tauka inginka iya, tauka nyembah iya, endang rinduka utai ti jai, lalu deka nerima ukum ti patut diterima iya ketegal iya manggaika pengandal iya ba utai nya.

⁷Tukang periuk bejimat ngaga utai ari tanah ladu ngambika tau diguna kitai. Sekeda utai nya ti digaga iya dikena kitai enggau manah, sekeda enda, tang iya ngaga semua utai nya ari tanah ngena jalai ti sebaka. Tukang periuk nya empu milih utai ti deka digaga iya nitihka guna utai nya.

⁸Iya empu endang mensia ti digaga ari tanah dulu mimit ari tu, lalu enda lama udah nya iya mesti mulaika semengat ti dijali ngagai iya, lalu iya nyadi tanah baru. Iya endang mensia, tang iya masau tulang iya ngaga patung petara ti nadai guna, ti sama digaga ari tanah ti dikena ngaga periuk.

⁹Umur iya pandak, lalu enda lama da iya deka parai, tang iya enda pedulika utai nya. Iya deka mekit orang ke ngaga utai ari mas, pirak enggau temaga, lalu ngaga utai baka sida nya. Iya temegahka utai ti digaga iya, tang utai nya tiru.

¹⁰Ati iya digaga ari abus. Pengandal iya murah agi ari debu. Seput iya kurang agi berega ari tanah ladu,

¹¹laban iya enda kala nemu Allah Taala ti ngaga iya, ti ngesuhka seput ngagai semengat ti regas enggau roh ti idup.

¹²Iya ngira pengidup mensia baka ke bemain aja, baka kedai endur ngiga untung. Iya arapka ngiga duit naka pemayuh ti ulih iya, taja jalai iya salah.

¹³Orang ke ngaga engkeramba enggau periuk ti mudah pechah ari tanah nya, endang nemu lebih agi ari orang bukai iya empu bedosa.

¹⁴Tang orang ke pengabis beli ari semua orang, mandangka diri kurang mereti ari anak mit, lalu sida nya munsuh ke nekanka nembiak Nuan, O Tuhan.

¹⁵Sida ngumbai semua engkeramba ti disembah sida ti kapil nya petara, taja engkeramba nya enda ulih meda enggau mata sida, enda ulih enseput ari idung sida, enda ulih ninga enggau pending sida, enda ulih ngasai enggau tunjuk sida, lalu enda ulih bejalai enggau kaki sida.

¹⁶Semua engkeramba nya digaga mensia ti bisi roh dijali ngagai sida. Nadai siku orang ulih ngaga siku petara ti sebaka enggau mensia.

¹⁷Lama laun genap iku orang sigi tetap mati, tang sebarang utai ti digaga enggau jari iya ti jai nya sigi mati ari pun. Indah iya empu deh lebih manah agi ari utai ti disembah iya. Sekurang-kurang iya, orang nya enseput, tang utai ti disembah iya enda nemu enseput, lalu endang enda kala enseput.

¹⁸Orang ke baka nya nyembah jelu ti dikenggaika, nyengkaum iya ti jelu ti nadai penemu.

¹⁹Indah jelu nya enda chukup manah ngasuh orang rinduka sida. Allah Taala empu semina mansa sida aja lebuh Iya muji lalu merekat utai bukai ti digaga Iya.