Read Iban Penemu-Dalam Solomon 18 Bible Online

Penemu-Dalam Solomon 18 - Iban bible

Penemu-Dalam Solomon 18

¹Nyadi lebuh nya penampak ti terang amat manchar ba nembiak Nuan ti kudus. Munsuh sida ninga nyawa sida, tang enda ulih meda sida. Sida ngining berekat nembiak Nuan nya ke enda merinsa.

²Bala munsuh patut beterima kasih laban orang ke disalah sida enda malas ngelaban sida diatu, nya alai sida dipinta angkat.

³Nya baru Nuan ngiring bala nembiak Nuan lebuh sida bejalai nengah menua ti enda temu sida. Nuan ngiring sida enggau tiang api. Api nya baka mata panas ti enda medis sida serantau-rantau jalai ti bemulia nya.

⁴Tang bala munsuh sida ke enda diasuh meda penampak ke patut dikurung dalam pemetang, laban sida udah ngurung nembiak Nuan. Nengah nembiak Nuan penampak Adat ti meruan belama-lama deka diberi ngagai dunya.

⁵Lebuh munsuh Nuan ngaga atur deka munuh bala anak lelaki nembiak Nuan ti kudus, dia bisi siku anak ke dibuai tang udah nya diselamat. Udah nya Nuan ngukum munsuh Nuan enggau jalai ti munuh mayuh amat anak sida. Bisi sekali Nuan ngelemaska semua bala soldadu sida ba ai ti bealun-alun.

⁶Tang bala aki ini kami udah dulu dipadah pasal utai ti deka nyadi malam nya. Nya alai sida gaga ati sereta diperansang laban sida arap ke semaya ti diberi Nuan ngagai sida.

⁷Nembiak Nuan endang nemu Nuan deka ngelepaska bansa ti lurus, lalu ngerusak munsuh sida.

⁸Enggau kereja ti sebaka Nuan ngukum munsuh kami, lalu ngangauka kami nyadi nembiak Nuan, lalu meri kami basa ti besai.

⁹Sekumbang maya nya orang ti angkunka Allah Taala ari bansa ti lurus tu belalai meri korban. Sida lalu besemaya enggau pangan diri deka ngasika Adat Allah Taala. Lalu sida mega besemaya deka bekunsika berekat enggau penusah enggau pangan diri. Sida endang udah dulu belagu ngena lagu lama.

¹⁰Tang sabak tusah ati bala munsuh sida didinga di semua endur, laban sida ngulitka pemarai bala anak sida.

¹¹Tuan enggau ulun sida, raja enggau semua rayat sama nerima ukum ti sebaka.

¹²Dia bisi tekelalu mayuh bangkai ti enda alah tiap. Enda mayuh orang ke agi idup nguburka semua bangkai. Dalam sekejap mata bala anak ti dikesayauka sida parai magang; semua pemarai sida nya sebaka magang.

¹³Orang nya enda pedulika jaku tangkan, tang bepangai ba kuasa orang ti tau engkeramat. Tang lebuh anak sida ti tuai lelaki dibunuh, nya baru sida nemu orang Israel nya anak Allah Taala.

¹⁴Tengah malam nya, semua utai sunyi magang sereta nadai engkeretik.

¹⁵Kemaya nya, enggau ngenyit pengawa Nuan dipejalaika! Jaku ti bekuasa pasal ukum datai jampat ari penuduk raja Nuan di serega, terus ke baruh nuju menua ti dirusak nya. Iya datai baka soldadu ti balat nyerang,

¹⁶ngereja pengawa nundaka asuh Nuan ngena senyata ti balat ngenakut, enggau kaki berindik ba tanah, lalu pala negu langit, ngisi menua nya enggau pemati.

¹⁷Maya nya sida ke deka parai balat remban.

¹⁸Di seluruh menua nya sida gali setengah mati, lalu madahka kebuah sida deka mati.

¹⁹Sida nemu kebuah sida deka mati, laban mimpi ti udu ngenakut madah ngagai sida.

²⁰Pemati bisi mega nuntung bansa ti lurus, ketegal mayuh sida kena penyakit ti bejangkit di padang pasir ba menua puang, tang pengeringat Nuan enda lama aja.

²¹Dia bisi siku orang ke manah ke jampat ngaga pengawa kena nyaga sida. Ketegal Aron mangku pengawa nyadi imam dia iya lalu besembiang, nunu menyan lebuh minta ampun ke dosa. Ngena sembiang enggau menyan ke senyata iya, Aron ulih nerima pengeringat Nuan lalu ngemaduka penusah nya. Ngena jalai nya iya mandangka diri imam Nuan.

²²Iya ulih ngalahka pengemar nya, tang ukai ngena pengering iya empu tauka kuasa soldadu. Iya semina ngena sembiang nagang ukum nya nyadi; iya minta Nuan ngingatka semaya Nuan enggau aki ini kami.

²³Mayuh bangkai udah ditugung, tang iya lalu nagang pengeringat Nuan lalu enda ngasuh ngerusak sida ke agi idup.

²⁴Iya ngena baju panjai ti dilagu enggau tanda langit enggau tanah. Ba dada iya bisi empat iti rintai batu berega ti diukir kena masa aki ini kami, lalu labung iya dilagu ngena marik nyadi ke tanda kuasa raja Nuan.

²⁵Melikat Pemati takut ke utai tu lalu ngetu. Pengeringat Nuan mimit aja udah diasaika sida, tang nya pen udah chukup.