Read Iban Penemu-Dalam Solomon 2 Bible Online

Penemu-Dalam Solomon 2 - Iban bible

Penemu-Dalam Solomon 2

¹Orang ke jai endang salah lebuh sida bejaku kediri empu munyi tu, “Pengidup kitai sigi pandak sereta penuh penusah, lalu maya pengujung iya datai, iya sigi enda ulih dikerarika. Nadai orang udah ditemu pulai baru ari dunya pemati.

²Kitai tu endang ada pia aja ke dunya tu, lalu udah seput kitai ambis, kitai asaika nadai ada ke dunya tu. Seput kitai baka asap ti dikesuh; runding kitai baka perechi api ari redup jantung kitai.

³Lebuh perechi api nya padam, tubuh kitai baka abus, lalu seput kitai baka angin kusung.

⁴Nyau kelama, orang nadai agi ingatka utai ti udah dikereja kitai, lalu nyentukka nama kitai enda meh ingat agi. Pengidup kitai mansa baka mua hari nadai bekau, lalu lesap baka ambun niki ke atas laban pengangat panchar mata panas.

⁵Pengelama kitai idup di dunya tu baka ayuk ti mansa. Nadai siku ulih rari ari maya iya mati. Utai nya udah ditetapka, lalu nadai siku orang ulih nangguhka hari nya nyadi.

⁶ Orang jai bejaku, “Aram meh ngelantangka diri enggau utai ti ngerinduka ati baka maya kitai agi biak suba enda pedulika nama-nama utai!

⁷Aram kitai ngirup wain anggur ti berega, lalu ngena minyak wangi ti pengabis badas. Anang muai peluang tu enggaika kitai enda ampit bungai maya iya bisi!

⁸Ambi bungai sebedau iya layu lalu kena ba buk kitai!

⁹Aram semua kitai sama enggau magang lalu ninggalka tanda di semua endur kena ngayanka ulah kitai ti enda pedulika sebarang utai! Tuju pendiau kitai sigi ngagai nya!

¹⁰Kitai deka ngenyakka sida ke miskin, taja sida orang lurus. Kitai anang masa sida ke balu enggau orang ke tuai.

¹¹Kitai deka ngumbai bala kitai betul enti kitai chukup kering ngulihka utai ti dikedeka kitai. Nadai siku orang tau bulih utai enti lemi.

¹²Orang ke lurus sigi nadai guna, semina ngachau aja. Aram kitai ngiga peluang munaska sida. Sida ngelaban utai ti dikereja kitai; sida ngumbai kitai ngelaban Adat Moses lalu enda nitihka ajar aki ini kitai.

¹³Sida ngumbai diri nemu Allah Taala, lalu ngaku diri nembiak Tuhan.

¹⁴Kitai enggai meda orang baka nya; sida jauh enda sepenemu enggau kitai.

¹⁵Sida enda baka orang bukai; jalai sida jauh nyelai.

¹⁶Sida ngumbai pengawa kitai salah, nya alai sida ngerarika diri ari pengawa kitai. Sida begah-begah ngumbai Allah Taala nya Apai sida, lalu sida arap dudi ila semina orang ke lurus aja deka lantang, lebuh semua utai tembu disebut enggau dikereja.

¹⁷Ila meh kitai meda enti utai nya amat! Ila kitai meda nama utai nyadi ba sida maya sida parai!

¹⁸Enti sida ke lurus nya endang amat anak Allah Taala, tentu Iya deka ngidupka sida ari munsuh.

¹⁹Aram kitai nguji sida. Kitai deka kasar enggau sida, lalu merinsa sida. Udah nya baru kitai nemu baka ni pengetan enggau penyabar ati sida! Kitai deka meda naka ni sida ulih tan ati!

²⁰Ila kitai ngerusak sida enggau pemati ti ngasuh sida malu. Nama tusah, laban ku sida Allah Taala deka ngelindung sida.”

²¹Baka nya meh runding orang ke jai, tang sida iya salah. Sida nyau buta laban penyai sida empu.

²²Sida nadai kala nemu utai ti dipelalaika Allah Taala; sida nadai kala andalka diri tau bulih upah ari pengidup ti kudus sereta lurus.

²³ Lebuh Allah Taala ngaga kitai, tuju Iya ukai deka ngasuh kitai mati; Iya ngaga kitai baka gamal Iya empu.

²⁴Ketegal Sitan kepapas ati nya kebuah pemati bisi di dunya tu, nya alai semina orang ke enggi Sitan aja ke deka mati ila.