Read Iban Penemu-Dalam Solomon 3 Bible Online

Penemu-Dalam Solomon 3 - Iban bible

Penemu-Dalam Solomon 3

¹Tang orang ke lurus semampai diibun Allah Taala, lalu sida enda deka ngasaika pemerinsa.

² Salah amat meh penemu ti ngumbai orang ke lurus deka mati, lalu pemati sida nya utai ti jai amat.

³Sida amat ninggalka kitai, tang nya ukai dikumbai penusah besai. Iya ti bendar, sida ke lurus endang amat lantang senang.

⁴Taja sida nya dipeda pedis merinsa, tang sida bisi pengandal bulih pengidup meruan.

⁵ Pemerinsa sida nya mit amat enti dibanding enggau berekat ti deka diterima sida. Allah Taala udah nguji sida, baka mas ti ditunu enggau api, lalu Iya meda sida amat tau begulai enggau Iya. Iya nerima sida, baka Iya ti nerima piring tunu ba alta ari orang ke nyembah Iya.

⁷Lebuh Allah Taala datai deka ngupah sida ke lurus, sida nya perenching baka daun api ti makai rumput rangkai lebuh dibanding enggau sida ke jai.

⁸Sida deka merintah mayuh menua enggau bansa, lalu Tuhan nyadi raja sida belama iya.

⁹Sida ke udah bepanggai ba Allah Taala deka meretika jalai Iya ti amat bendar. Sida ke udah talukka Iya deka diau begulai enggau Iya dalam pengerindu Iya, laban Iya endang mentas sereta kasih ke sida ke udah dipilih Iya.[1]

¹⁰Orang ke enda arap ke Allah Taala deka nerima ukum ti endang patut ketegal runding sida jai, laban sida ngelaban Tuhan lalu enda pedulika utai ti lurus.[2]

¹¹Orang ke enda begunaka pemandai tauka pelajar deka ngasaika pengidup ti tusah disediaka ungkup iya. Iya nadai utai dikandal, nya alai pengawa iya puntan, lalu nadai pengujung ti manah.

¹²Indu ke jadi enggau iya nyau enda mereti, lalu bala anak iya ngaga penyai. Semua peturun iya nadai berekat.

¹³Ba Hari Pechara Besai ila Allah Taala deka ngupah indu ke punas enti iya enda kala butang. Nya baru iya lantang senang.

¹⁴Ba maya hari nya ila, orang ke udah diperiri bela diupah enggau pengelantang, enti iya udah ngasika Adat sereta enda nyimpan pengeringat ngelaban Tuhan. Ketegal iya udah taluk, iya deka nerima upah ti jauh lebih manah ari orang ke bisi anak: bulih endur ba Rumah Tuhan di serega.

¹⁵Pengawa ti lurus disema baka kayu ti bebuah manah amat. Penemu-dalam nya sigi baka urat ti semampai idup, selalu nyumbuk belama.

¹⁶Tang bala anak ke ada ketegal butang tauka laban jadi mali deka pandak umur.

¹⁷Enti sida idup panjai umur, pengidup sida enda menuku. Sida enda dibasa orang lebuh sida nyau tuai.

¹⁸Enti sida parai agi biak, sida nadai utai dikandal tauka nadai pengelantang ba Hari Pechara Besai ila.

¹⁹Bala anak ke ada ari ketegal pengawa ti jadi mali deka ngasaika penusah.