Read Iban Penemu-Dalam Solomon 4 Bible Online

Penemu-Dalam Solomon 4 - Iban bible

Penemu-Dalam Solomon 4

¹ Endang badas agi ngembuan perangai ti manah, taja punas. Perangai nuan ti manah dikelala orang enggau Allah Taala, lalu nuan deka dikingatka belama.

²Perangai ti manah nyadika teladan orang; lalu enti iya nadai dia orang berasai puang. Iya selalu nyadi upah ti pengabis manah, lalu endang selalu baka nya belama. Iya nyadi ulah ti pengabis manah ari semua utai ti manah ti dikemisi orang.

³Nadai ngira berapa pemayuh anak ada ari jadi mali, siku nadai meh bisi reti. Sida nya baka anak ampang, lalu nadai tulihka utai ti nyadi pun pengering pengidup sida empu laban pengawa sida nadai urat ti dalam.

⁴Baka kayu ti mabu urat, sida bedaun enda lama, lalu sida beguyang laban angin, lalu techabut enti dipuput ribut kudi.

⁵Sebedau besai dan sida udah tingkal; buah sida enda kala mansau, lalu nadai guna sekali-kali.

⁶Ba Hari Pechara Besai ila anak sida ke jadi mali deka bejaku nusi penyalah apai indai sida, lalu nyadi saksi ngelaban sida.

⁷Tang orang ke lurus deka nyamai pendiau, taja sida parai biak.

⁸Kitai bebasaka orang ke nyau tuai, tang ukai kebuah iya panjai umur.

⁹Penemu-dalam enggau pengelurus nya tanda tuai runding ti setipak enggau umur ti tuai.

¹⁰ Bisi siku orang benama Enok ke ngerinduka Allah Taala, lalu Allah Taala rinduka iya. Lebuh iya diau begulai enggau orang ke bepenyalah, Allah Taala mindahka iya ke bukai.

¹¹Kebuah pia ngambi penyai enggau utai ti salah enda masuk pikir enggau semengat iya.

¹²(Kitai bela nemu pasal orang tetarit ati laban utai ti jai dataika sida nyau enda ngelala utai ti badas, taja utai nya segenda dipeda mata sida. Orang ke nadai nemu utai muntang amat kena tarit ulih pengingin ti ngujungka sida nadai runding bukai agi tang semina berundingka utai ti dikinginka sida aja.)

¹³Orang tu ke benama Enok bulih pemadas dalam kandang tiga empat taun; orang bukai enda tulihka utai nya dalam seumur idup sida.

¹⁴Tuhan rindu meda pengidup Enok lalu jampat ngambi iya ari dunya ti jai tu. Orang nemu iya nadai agi, tang sida enda mereti. Sida enda belajar ari utai ti nyadi

¹⁵pasal Allah Taala ke mentas sereta kasih ke nembiak Iya; Iya ngibun sida ke dipilih iya.

¹⁶Taja orang ke lurus udah parai, sida ngemalu orang jai ke agi idup ditinggalka sida. Orang biak ke manah pendiau deka ngemalu orang jai ke nyau tuai.

¹⁷Sekeda orang ke bepenemu-dalam bisi parai maya sida agi biak, tang orang ke jai enda nemu nya endang atur Tuhan ti deka nyelamatka sida.

¹⁸Sida enda peduli maya orang lurus mati, tang enda lama da Allah Taala deka ketawaka sida. Lebuh sida mati, sida enda diberi basa maya numbakka bangkai sida di pendam. Nyentukka orang ke udah parai enda meh bebasaka sida.

¹⁹Allah Taala deka ngasuh sida rebah ke tanah lalu ngasuh sida enda tau bejaku. Sida nya baka rumah ti rubuh, lalu ramu iya merapuh. Sida deka pedis merinsa. Orang jampat enda ingatka sida.

²⁰Sida deka datai ngagai Pechara Besai enggau ati takut, dia semua penyalah sida deka dikira magang, lalu sida deka diukum ketegal pengawa sida empu ti enda beradat.