Read Iban Penemu-Dalam Solomon 7 Bible Online

Penemu-Dalam Solomon 7 - Iban bible

Penemu-Dalam Solomon 7

¹Aku nemu mati baka mensia bukai. Aku endang peturun mensia keterubah digaga ari tanah. Aku dikandungka pengelama sembilan bulan, lalu dalam timpuh nya aku mansang besai.

³Lebuh aku ada, aku datai ke dunya tu baka orang bukai. Aku enseput enggau angin baka orang bukai, lalu baka orang bukai munyi nyawa aku ti keterubah, iya nya, nyabak.

⁴Aku dibalut ngena kain lalu diibun.

⁵Nadai siku raja berengkah enggau pengidup ti lain agi ari enggi orang bukai.

⁶Tiap iku mensia endang nengah siti aja jalai idup masuk ke dunya tu, lalu siti aja jalai pansut ari dunya tu.

⁷ Laban aku nemu diri empu endang mensia, nya alai aku besembiang, lalu diberi pemereti, lalu roh Penemu-dalam datai ngagai aku.

⁸Aku ngira iya lebih tinggi ari penuduk tauka makuta raja. Pengeraja nadai banding enggau iya.

⁹Pemesai reti Penemu-dalam jauh lebih ari batu intan; semua mas dalam dunya baka segenggam pasir ti dibanding enggau Penemu-dalam, lalu pirak baka tanah dibanding enggau iya.

¹⁰Aku ngira iya lebih agi ari pengerai enggau pemanah gamal. Penampak iya enda nemu kelabur. Aku sigi milih iya ari penampak bukai.

¹¹Lebuh Penemu-dalam datai ngagai aku, semua utai ti manah sama datai enggau iya. Iya mai ngagai aku mayuh macham pengeraja.

¹²Gaga amat ati aku ke semua utai nya, laban Penemu-dalam udah mai sida ngagai aku. Dulu suba aku enda nemu iya endang pun semua utai ti manah nya.

¹³Aku bebendar belajar ari iya. Nya alai, diatu aku deka magi utai ti udah dipelajarka aku.

¹⁴Nadai orang ulih ngabiska utai ti manah ari Penemu-dalam. Kena utai ti manah nya, lalu nuan deka nyadi pangan Allah Taala ti ngemendarka utai ti dipelajarka nuan ari iya.

¹⁵Aku besembiang ngagai Allah Taala ngambika pikir aku setipak enggau utai ti udah dipelajarka aku, lalu awakka aku bejaku enggau patut nunda peneka Iya. Iya ke ngiring Penemu-dalam; Iya ngemetulka sida ke bepenemu.

¹⁶Kitai empu, jaku kitai, semua pemereti enggau pengelandik kitai dipegai kuasa Iya magang.

¹⁷Sigi Iya ti meri aku penemu pasal pun penyadi semua utai: baka ni dunya tu digaga; baka ni gaya utai di dunya bekereja.

¹⁸Baka ni haribulan diatur nitihka pejalai matahari, baka ni musin tau berubah.

¹⁹Baka ni bintang enggau bulan di langit bejalai, sereta baka ni ubah taun.

²⁰Iya bisi ngajar aku pasal gaya utai ti idup, gaya pendiau jelu kampung, pasal kuasa ribut, kuasa mensia ti ulih bepikir, pemayuh macham kayu babas enggau baka ni urat utai nya tau diguna ke ubat.

²¹Aku belajarka utai ti ditemu enggau utai ti enda kala ditemu dulu suba,

²²laban Penemu-dalam ti ngaga semua utai nyadika pengajar aku. Roh Penemu-dalam sigi pintar sereta kudus. Iya mandangka diri enggau mayuh macham jalai.Iya ukai digaga ari sebarang utai, lalu iya bejalai di semua endur. Iya endang terang, beresi, sereta bepengarap; iya enda ulih dirusak. Iya rinduka utai ti badas, iya tajam sereta enda ulih dialahka.

²³Iya sigi mentas sereta nyadi kaban kitai mensia. Iya endang tau dikarapka sereta tetap, lalu iya nadai pengirau. Iya bisi kuasa atas genap utai sereta meda semua utai. Iya masuk ke dalam semua roh ti pandai sereta tuchi, enda ngira sekalika utai nya mit.

²⁴Pejalai Penemu-dalam lebih mudah ari semua utai; iya endang tuchi amat nya alai ulih masuk semua utai.

²⁵Iya endang kuasa seput Allah Taala - mulia ti tuchi sereta tampak manchar ari Iya Pemadu Bekuasa. Nadai utai kamah ulih masuk ngagai Penemu-dalam.

²⁶Iya siti panchar penampak ti meruan, siti cheremin ti pemadu manah kena meda pengawa enggau pemadas Allah Taala.

²⁷Taja Penemu-dalam bekereja kediri, iya ulih ngereja sebarang utai. Iya ngaga semua utai baru magang, taja iya empu enda betukar. Ari serak siti ngagai serak siti iya tama semengat orang ke kudus, lalu ngaga sida nya nyadi pangan Allah Taala, lalu nyadi nabi.

²⁸Allah Taala rindu amat ke orang ti rinduka Penemu-dalam lebih ari utai bukai.

²⁹Penemu-dalam sigi lebih agi manah ari mata panas, bintang enggau bulan di langit. Iya badas agi ari penampak,

³⁰laban malam sigi selalu nitihka siang hari, tang penyai enda kala ngalahka Penemu-dalam.