Read Iban Penemu-Dalam Solomon 9 Bible Online

Penemu-Dalam Solomon 9 - Iban bible

Penemu-Dalam Solomon 9

¹“Allah Taala aki ini aku, Tuhan ti kasih, enggau jaku Nuan, Nuan ngaga genap utai.

²Ngena Penemu-dalam Nuan, Nuan ngaga mensia ngambika bekuasa atas semua utai,

³ngambika merintah dunya ngena pengudus enggau pengelurus, ngambika bejalaika adat enggau betul.

⁴Beri ke aku Penemu-dalam ti duduk ngimbai kerusi raja Nuan; beri ke aku penuduk begulai enggau nembiak Nuan.

⁵Aku tu pemela Nuan, baka indai aku ke dulu ari aku. Aku semina mensia biasa. Aku enda kering, lalu umur aku pandak. Aku kurang penemu pasal Adat tauka baka ni ngena iya.

⁶Taja pan orang nya dikira chukup manah, tang iya dikumbai nadai reti enti nadai Penemu-dalam datai ari Nuan.

⁷Nuan udah milih aku ngambika nyadi raja ke bala nembiak Nuan empu, ngambika ngakim bala anak lelaki enggau anak indu Nuan.

⁸Nuan udah ngasuh aku ngaga Rumah Sembiang ba bukit kudus Nuan, alta di Jerusalem, nengeri ti dipilih Nuan ke rumah Nuan. Iya nunda rumah sembiang di serega ti udah disediaka ulih Nuan ari pun.

⁹Penemu-dalam endang enggau Nuan, lalu nemu pengawa Nuan; iya endang bisi lebuh Nuan ngaga dunya. Iya nemu ngerinduka Nuan, nemu utai ti betul nitihka padah Nuan.

¹⁰Kirumka iya ari serega ti kudus, nurun ari kerusi raja Nuan ti bemulia, ngambika iya bekereja ngimbai enggau aku, lalu aku ulih belajar nama utai ti ngerinduka Nuan.

¹¹Iya nemu sereta meretika semua utai, lalu iya ngiring aku enggau pemintar dalam pengawa aku. Mulia iya deka nyaga aku.

¹²Nya baru aku ulih ngakim bala nembiak Nuan enggau pengelurus, lalu ngasuh aku amat patut duduk ba kerusi raja apai aku. Lalu semua kereja aku deka diterima.

¹³“Sapa ke ulih belajar pasal peneka Allah Taala?

¹⁴Runding mensia sigi enda ulih ngereja pengawa nya, lalu pikir kami mensia sigi ngelimpangka kitai,

¹⁵laban tubuh mensia ke nemu parai nekanka pemerat ba semengat kami. Tubuh kami mensia sigi endur ti sementara aja ti digaga ari tanah, lalu iya nekanka runding kami mensia.

¹⁶Nya kebuah kami semina nyangka aja pasal utai di dunya tu; lalu kami bebendar deka belajar pasal utai ti begulai enggau kami. Sapa ke ulih meretika utai serega?

¹⁷Nadai siku orang udah kala belajar pasal peneka Nuan, semadi meh Nuan dulu meri iya Penemu-dalam, sereta ngirumka Roh Kudus Nuan ngagai iya.

¹⁸Ngena jalai nya mensia di dunya tu ulih nengah jalai ti betul, lalu ulih belajarka utai ti ngerinduka Nuan, lalu sida diibun enggau likun ulih Penemu-dalam.