Read Iban Sirakh 1 Bible Online

Sirakh 1 - Iban bible

Sirakh 1

¹JAKU PEMUKA Bup Penemu Dalam Jesus, Anak lelaki Sirak, ti mega dikumbai Eklesiastikus, ditulis dalam jaku Hebrew ulih orang siku benama Josua (tauka Jesus) lalu disalin ngagai jaku Gerika ulih uchu lelaki iya. Bup tu nusi pasal penemu asal bansa Judah sereta ngeringka adat pengarap sida ngena jalai nunjukka Allah Taala amat meri ngagai sida penemu ti betul. Mayuh penemu pasal pengarap, pemanah pendiau enggau utai ti patut dikereja disimpan dalam bup tu, bisi sekeda panjai lalu bisi mega pandak ngena jaku dalam. Isi • Muji Penemu Dalam (Bagi I) 1.1-23.27 a. Pengawa, Upah, enggau Lalau ti Manah 1.1-16.23 b. Penemu Allah Taala enggau Saut Mensia 16.24-23.27 • Muji Penemu Dalam (Bagi II) 24.1-50.21 a. Penemu Dalam enggau Perangai ti Manah 24.1-32.13 b. Penemu Allah Taala, Sembah enggau Pengawa Mensia 32.14-42.14 c. Mulia Allah Taala dalam dunya ti digaga Iya 42.15-43.33 d. Muji Bala Aki Ini Kelia 44.1-50.21 • Penut(...)

²Sapa ulih niap pasir di tebing tasik, titik leka ujan tauka pemayuh hari ti enda nemu ambis?

³Sapa ulih ngira peninggi langit, pemesai dunya, penalam tasik besai tauka penalam Penemu Dalam?

⁴Penemu-dalam digaga dulu ari semua utai bukai; lalu pemereti endang meruan bisi belama.[1]

⁶Kati bisi orang udah dipadah ari ni pun Penemu-dalam? Kati bisi orang meretika pemandai iya ti enda berupai dipeda?[2]

⁸Semina siku aja ke amat bepenemu, iya nya, Tuhan ke duduk atas kerusi rajah. Kitai patut nangi sereta bebasaka Iya.

⁹ Tuhan empu ngaga Penemu Dalam. Iya meda sereta nemu Penemu Dalam. Nya alai, semua utai ti digaga Iya, disi Iya enggau Penemu Dalam.

¹⁰Genap iku mensia nerima Penemu Dalam ti setipak enggau pemeri Tuhan; tang iya meri Penemu Dalam ngagai orang ke rinduka Iya.

¹¹Penangi ke Tuhan deka mai basa sereta temegah ati, pengelantang enggau ati gaga ti besai amat.

¹²Penangi ke Tuhan ngasuh ati nyamai sereta meri pengaga, ati ti senang lantang sereta gayu guru.

¹³Orang ke nangika Tuhan dudi ila sigi mujur; Allah Taala deka merekat iya ba hari pemarai iya.

¹⁴Penangi ke Tuhan nya sigi singkang ti keterubah nuju Penemu Dalam; orang ke taluk deka nerima Penemu Dalam, benung agi dalam kandung indai sida.

¹⁵Penemu Dalam endang udah bisi ba mensia ari menya, lalu meruan mengkang ba peturun sida.

¹⁶Penangi ke Tuhan endang Penemu Dalam ti chukup amat; Penemu Dalam deka muaska ati kitai enggau semua pemeri iya.

¹⁷ Iya ngisi rumah enggau gudang kitai enggau semua utai ti dikinginka ati kitai.

¹⁸Penangi ke Tuhan nya makuta Penemu Dalam ti mansang sama enggau pengelantang sereta pengerai.[3]

¹⁹Penemu Dalam deka meri penemu enggau pemereti sereta pemandai. Orang ke ngembuan Penemu Dalam deka bulih basa ti nambah-senambah.

²⁰ Penangi ke Tuhan sigi pun urat Penemu Dalam, lalu umur ti panjai nyadika dan iya.[4] Nagang Diri

²²Orang ke ringat sengapa nadai kebuah sigi enda bulih pengampun, laban pengeringat ti nyau lebih baka nya ngerusak mensia.

²³Orang ke liat ati nganti maya ti patut deka gaga dudi hari.

²⁴Orang ke diau diri deka dipuji orang ba maya ti patut laban sida mereti. Penemu Dalam Enggau Basa ke Allah Taala

²⁵Penemu Dalam sigi sarang jaku dalam, tang orang ke bedosa endang ngumbai pendiau ti manah nadai guna.

²⁶Enti nuan inginka Penemu Dalam, nuan mesti talukka semua pengasuh Tuhan, nya baru Iya deka meri nuan Penemu Dalam.

²⁷Orang ke nangika Tuhan, iya nya, orang ke pintar sereta bepejalar. Tuhan rinduka orang ke taluk sereta ngemaruhka ati diri.

²⁸Anang enda nangika Tuhan sereta semak Iya enggau ati lurus. Anang nyembah Tuhan enggau ati enda lurus.

²⁹Anang enda bejimat nyebut utai.

³⁰Anang nyumbungka diri ngambika nuan enda labuh sereta enda malu, laban Tuhan deka mantaika utai ti dipelalalika nuan, lalu deka ngasuh nuan malu di mua orang mayuh, laban nuan enda nangika Tuhan tang semina pura-pura aja.