Read Iban Sirakh 10 Bible Online

Sirakh 10 - Iban bible

Sirakh 10

¹Orang bekuasa ke chakah sereta pintar ngajar rayat iya, lalu merintah sida ngena jalai ti betul.

²Orang di nengeri nya enggau sida ke kereja perintah selalu beteladanka orang ke merintah sida. O

³Raja ke enda pandai deka nganchurka rayat iya. Nengeri ti dipigai orang ke pintar deka maju.

⁴Tuhan beratika perintah dunya lalu Iya ngangkatka orang ke patut merintah ba maya ti ditetapka Iya.

⁵Pemujur orang sigi dalam jari Tuhan, lalu Tuhan meh ngupah orang ke megai perintah. Penyumbung

⁶Anang begedi ngagai diri sama diri ketegal tiap penyalah ti digaga sida, lalu anang ngereja ulah ti kasar.

⁷Perangai ti sumbung engggau enda lurus adat sigi dibenchi ulih Tuhan tauka mensia.

⁸Ketegal pengawa ti enda lurus, penyumbung sereta gila duit, nya alai perintah betukar-tukar.

⁹Mensia semina baka pasir enggau abus; nama utai ti deka ditemegahka? Neh benung agi idup tubuh udah bau but.

¹⁰Penyakit ti enda ulih disumanka udah ngasuh bala lutur bingung. Neh orang ke bepangkat rajah merintah menua sehari tu deka mati pagila.

¹¹Lebuh orang mati, utai ti dikemisi iya semina belut, lalat enggau ulat.

¹²Penyumbung berengkah maya orang ninggalka Tuhan, lalu ngenyauhka ati sida ari Iya ke ngaga sida.

¹³Dosa nya pun penyumpung. Orang ke sumbung majak ngereja penyai laban ati sida penuh enggau penyai. Nya meh kebuah Tuhan udu merinsa sereta ngerusak sida.

¹⁴Tuhan udah kala muai bala raja lalu ngangkatka orang ke baruh ati nganti sida.

¹⁵Tuhan udah kala nyabut mayuh bansa sereta enggau urat-urat sida, lalu nganti sida enggau orang ke baruh ati.

¹⁶Iya ngalah sereta ngerusak menua sida abis lengis.

¹⁷Bisi mega dirusak sereta dipunaska ari dunya tu, lalu enda dikingatka agi.

¹⁸Tuhan ke Pengaga nadai ngasuh mensia sumbung sereta kasar enggau orang. Orang ke Patut Dibasa

¹⁹Sapa ke patut dibasa? Orang ke takutka Tuhan. Sapa orang ke patut disalah? Orang ke ngelanggar jaku Tuhan.

²⁰Siko tuai dibasa kaban belayan iya, lalu Tuhan bebasaka orang ke nangika Iya.[7]

²²Nangika Tuhan patut nyadi utai ti ditemegahka semua orang, baik iya kaya, baik iya beberita, tauka orang ke miskin.

²³Sigi salah ngeleseka orang miskin ke mereti, lalu sigi salah bebasaka orang ke bedosa.

²⁴Orang ke beberita, ke bekuasa, enggau bala akim sigi patut dipebasaka, tang ari semua sida nya nadai lebih besai ari iya ke nangika Tuhan.

²⁵Siko ulun ke pintar deka dintu ulih orang ke ukai ulun, lalu enti sida nya orang ke mereti, sida enda begedika iya. Ati ti Baruh enggau Bebasaka Diri Empu

²⁶Anang ngaga diri pandai lebuh nuan bekereja, lalu anang ngaga diri baka orang besai lebuh nuan mayuh pengurang.

²⁷Manah agi bekereja lalu bisi utai ari ke ngaga diri baka orang besai tang kurang pemakai.

²⁸Anak aku, nuan enda tau enda bebasaka diri empu sereta baruh ati. Bebasaka diri empu enggau patut.

²⁹Sapa ngumbai orang ke bedosa betul? Sapa deka bebasaka orang ke enda bebasaka diri empu?

³⁰Orang miskin dibasa laban sida bepenemu, nyadi orang ke kaya dibasa ketegal pengaya sida.

³¹Enti orang miskin dibasa, iya deka lebih agi dipebasaka enti iya kaya. Enti orang kaya dikeleseka, iya deka lebih dikeleseka enti iya miskin.