Read Iban Sirakh 11 Bible Online

Sirakh 11 - Iban bible

Sirakh 11

¹Ketegal orang miskin nya bisi penemu-dalam, iya temegah ati, lalu deka diterima olih orang ke besai pangkat. Gamal Orang

²Anang muji orang laban iya sigat, lalu anang ngemelika orang laban gamal iya jai.

³Ari semua utai ti bisi sayap, manyi nya meh sebengkah indu utai ti pengabis mit, tang iya mansutka ai ti pengabis manis.

⁴Anang temegah ati ke pekayan ti manah, lalu anang sumbung lebuh nuan dikemesaika orang. Utai nya baka nya laban pengawa Tuhan udu nyelai, lalu enda ditemu mensia.

⁵Mayuh raja dibuai ari penuduk sida, lalu duduk di baruh. Tang orang siku ke enda ditemu orang, diangkat nyadi raja.

⁶Mayuh orang ke bekuasa nyau malu, lalu mayuh orang ke dibasa labuh ngagai jari orang bukai. Bejaga

⁷Anang mantah sebedau meresa; peratika dulu sebedau mantah.

⁸Pendingka dulu sebedau nyaut; lalu anang neba benung orang bejaku.

⁹Anang bechakah pasal pekara ti nadai kaul enggau nuan, lalu anang nabakka diri ngagai laya orang ke bedosa.

¹⁰Anak aku, anang ngiruh diri enggau tekelalu mayuh pengawa. Enti pengawa nuan tekelalu mayuh nuan tentu tusah. Nuan enda ulih nembuka iya, lalu nuan mega enda ulih nyeliahka diri ari iya.

¹¹Bisi orang kereja bebendar mangkaka tulang enda ngira jam tang mengkang nadai utai ulih.

¹²Bisi orang miskin amat, lalu begunaka tulung laban enda ulih ngereja pengawa. Tang Tuhan rinduka iya, lalu ngangkatka iya ari penusah.

¹³Tuhan ngangkatka iya sampaika orang bukai alit ati.

¹⁴Semua utai nya bepun ari Tuhan: manah enggau jai, miskin enggau kaya, idup enggau mati.

¹⁵Penemu-dalam, pemereti, penemu pasal Adat, pengasih enggau pengawa ti manah datai ari Tuhan.

¹⁶Penyalah enggau pemetang endang udah enggau orang bedosa kenyau ari pun, lalu orang ke rinduka penyai deka ngembuan iya sampai parai.

¹⁷Orang ke taluk tetap nerima upah Tuhan. Pemanah Tuhan ngiring iya belama-lama iya.

¹⁸Bisi orang nyadikaya laban bekereja bendar sereta ngenyadi. Tang nama penguntung iya?

¹⁹Ku iya bejaku dalam ati diri, “Diatu aku tau belelak, lalu ensepi asil kereja aku.” Tang iya enda nemu berapa lama iya agi idup sebedau iya parai, lalu ninggalka semua reta iya ke orang bukai.

²⁰Kereja meh pengawa nuan enggau taluk sampaika tuai.

²¹Anang chemburu enggau utai ulih orang bedosa. Kereja meh pengawa nuan enggau taluk lalu arap meh ke Tuhan. Utai nya baka nya, laban Tuhan ulih ngasuh orang ke miskin ngenyit kaya.

²²Orang ke taluk nerima berekat Allah Taala nyadika upah iya, lalu sekejap mata Tuhan ngasuh berekat iya nambah.

²³Anang nanya: Nama utai ti agi diguna aku, lalu nama utai ti empai dikemisi aku?

²⁴Lalu anang mega berunding ngumbai diri udah chukup lalu nadai utai ngerusak dudi ila.

²⁵Lebuh senang orang enda ingatka penusah diri, lalu lebuh tusah iya enda ingatka penyenang diri.

²⁶Ba Tuhan nyamai agi Iya nganti maya orang nya parai endur Iya ngupah tauka ngukum orang nya setipak enggau ulah iya.

²⁷Maya nya ila, semua ulah iya ditemu magang; lalu penusah sejam ngasuh iya enda ingatka semua penyenang ti udah diasaika iya.

²⁸Nya alai anang ngumbai pengidup orang nya nyamai sebedau iya parai, laban ulah iya deka ditemu maya iya parai ila. Bejaga Ari Orang Jai

²⁹Anang ngelaluka genap iku orang ke rumah nuan, laban orang ke pandai mayuh jalai nipu.

³⁰Orang ke sumbung baka manuk kampung dalam kerungan ti nemu narit ati mai nuan tusah, tauka baka mata gelap ke nengkilaka penyai nuan kena ngelabuhka nuan.

³¹Iya sigi nganti peluang endur iya ngalihka utai ti manah nyadi jai kena iya mantah pengawa ti manah.

³²Siti aja perechi bungai api tau ngidupka arang, lalu orang ke bedosa sigi nganti peluang endur munuh nuan.

³³Bejaga meh ari orang ke jai laban iya ngaga atur ti jai ngambika iya enda ngerusak nuan belama-lama.

³⁴Enti nuan mai orang ke enda dikelala makai di rumah nuan, iya deka ngaga penusah lalu ngasuh kita sebilik belaya.