Read Iban Sirakh 12 Bible Online

Sirakh 12 - Iban bible

Sirakh 12

¹Anang Manah Enggau Sebarang Orang Enti nuan deka manah, nuan mesti nentuka sapa orang ke patut nerima pemanah nuan, nya baru pemanah nuan enda tebasau[8]

²Manah meh enggau orang ke talukka Tuhan, lalu nuan deka nerima balas, enti enda ari sida, ari Tuhan ke Pemadu Bekuasa.

³Orang ke majak ngaga penyai nadai nerima pemanah, baka nya mega orang ke enggai meri sedekah.

⁴Beri ngagai orang ke talukka Tuhan, tang anang nulung orang bedosa.

⁵Manah meh enggau orang ke baruh ati, tang anang meri utai ngagai orang ke jai. Anang meri sida pemakai enggaika sida lebih kering ari nuan. Kebuah pia, laban pemanah nuan ngagai sida ke jai deka dibalas sida enggau penyai dua kali lipat.

⁶Allah Taala ke Pemadu Tinggi mega begedika orang ke bedosa, lalu Iya deka ngukum sida.

⁷Beri ngagai orang ke manah, tang anang nulung orang ke bedosa. Pangan ke Betul Ati enggau Pangan Ngapa

⁸Maya senang, tusah deka nemu pangan ke amat, lalu lebuh maya tusah mudah ngelala munsuh.

⁹Lebuh orang senang, munsuh iya pedis ati; tang lebuh iya tusah, pangan iya pen ninggalka iya.

¹⁰Anang sekali-kali arapka munsuh laban penyai sida deka ngerusak baka tegar.

¹¹Bejimat, lalu bejaga meh ari iya, taja iya dipeda baka ke baruh ati sereta bejalai mungkukka diri. Gaga iya baka orang ke mugal chermin ti ngujungka tegar iya lenyau.

¹²Anang ngasuh munsuh nuan duduk semak nuan; ila iya deka nyeging nuan lalu ngambi tempat nuan. Anang ngasuh iya duduk sebelah kanan nuan; ila iya muai nuan ari pangkat nuan ti dipebasaka. Ila baru nuan ngumbai jaku aku amat, lalu nesal lebuh tingatka jaku lalau aku.

¹³Nadai orang berasai kasih enti orang ke main enggau ular tauka nyinakka jelu mangah kena gigit.

¹⁴Baka nya mega, nadai orang berasai kasih lebuh nuan begulai enggau orang ke bedosa lalu kena penusah laban penyai iya.

¹⁵Diatu iya diau enggau nuan. Tang lebuh nuan kena penusah, iya nadai dia nulung nuan.

¹⁶Munsuh sigi manis jaku, tang dalam ati, iya berundingka jalai kena ngelabuhka nuan. Iya ngaga diri tusah ati, tang enti iya bisi peluang iya deka munuh nuan.

¹⁷Lebuh nuan dalam penusah, iya ngaga diri deka nulung; tang ke bendar, iya deka ngelabuhka nuan.

¹⁸Udah nya, iya ngilikka pala, nempapka jari, lalu ngerembaika berita bula pasal nuan, sereta mandangka sapa iya ti bendar.