Read Iban Sirakh 13 Bible Online

Sirakh 13 - Iban bible

Sirakh 13

¹Tasat Orang Kaya Ke Sumbung Orang ke negu getah deka kamah, lalu orang ke begulai enggau orang ke sumbung deka sumbung baka sida.

²Anang ngangkatka utai ti tekelalu berat ba nuan, lalu anang begulai enggau orang ke lebih kaya enggau lebih bekuasa ari nuan. Anang nyendika periuk tanah enggau kali besi, laban enti besengki tentu periuk tanah belah.

³Orang kaya ngereja utai ti enda lurus sereta jai jaku enggau orang. Orang miskin diperinsa laban pengawa orang ti enda lurus, tang agi mega sida diasuh minta ampun.

⁴Enti nuan bisi nguntungka sida, nuan diguna orang kaya; tang enti nuan begunaka tulung sida, sida ninggalka nuan.

⁵Lebuh nuan bisi reta, orang kaya deka begulai enggau nuan. Sida enda ibuh gawa tang ngeruk reta nuan.

⁶Lebuh orang kaya begunaka nuan, iya tuchum ngagai nuan ngambika nuan tebuka ati. Enggau jaku alus iya nanya nuan, “Nama utai diguna nuan?”.

⁷Iya balat nyamu nuan enggau pemakai sampaika nuan berasai malu. Pengujung iya, udah iya ngerampas reta nuan dua tiga kali lipat, udah nya iya ketawaka nuan. Dudi ila, lebuh nuan betemu enggau iya, iya ngaga diri enda ngelala nuan, lalu ngelimpas nuan aja.

⁸Bejaga, anang ngelakka diri ditipu, lalu dikelese ketegal pemeli nuan. Anang Arapka Orang Besai Pangkat

⁹Enti nuan dipinta datai ngagai rumah orang ke bekuasa, nuan mesti nemu mai diri. Nya baru nuan suah agi dipinta iya datai.

¹⁰Anang tekelalu ngelebihka diri enggaika nuan ditulak, tang anang mega tekelalu ngemelika diri enggaika nuan enda dikingat.

¹¹Anang nuan ngaga diri sebaka enggau orang ke bekuasa nya. Anang mega arapka semua jaku iya, laban enggau jalai nya iya nguji nuan lalu enggau tuchum manis iya ngulihka nuan.

¹²Jai amat orang ke nusi utai ti dipelalaika nuan; iya enda takut nelihka ati nuan tauka ngejel nuan.

¹³Simpan utai ti dipelalaika nuan dalam ati, lalu bejaga meh, laban nuan bejalai ba endur ti bisi penusah. [9] Begulai Meh Enggau Orang ke Sama Pendiau

¹⁵Tiap utai idup sigi rinduka bansa diri empu, baka nya mega mensia deka begulai enggau diri sama diri.

¹⁶Baka jelu deka begulai enggau raban iya empu, baka nya mega mensia deka begulai enggau orang ke sebaka enggau iya.

¹⁷Baka ukui kampung enda ulih begulai enggau anak bedus, baka nya mega orang ke bedosa enda ulih begulai enggau orang ke lurus.

¹⁸Ukui kampung enda ulih bebaik enggau ukui inang; baka nya mega orang kaya enda ulih bebaik enggau orang miskin.

¹⁹Keledai babas nyadi pemakai singa di babas; baka nya mega orang miskin nyadi dengah orang kaya.

²⁰Ati baruh nadai reti ba orang ke sumbung; baka nya mega orang miskin dikumbai orang kaya nadai reti.

²¹Lebuh orang kaya tesangkut, iya disukung ulih bala pangan iya. Tang enti orang miskin rebah, pangan iya ngaga diri enda ngelala.

²²Lebuh orang kaya dalam penusah, mayuh orang bejaku ngarika iya. Enti iya nyebut jaku salah, utai ku iya nya dikumbai amat. Tang enti orang miskin bisi silap, iya dibantah orang. Lalu enti jaku iya bisi bepenemu, iya enda dipedulika.

²³Enti orang kaya bejaku, orang mayuh diau enda memunyi, lalu jaku iya dipuji ninggi langit. Tang enda baka nya enti orang miskin bejaku, semua orang nanya, “Sapa iya?”. Enti jaku iya katat-katat, iya lalu diju ngambika badu agi bejaku.

²⁴Pengaya sigi manah, asal iya ukai ulih enggau jalai bedosa. Tang miskin dikumbai jai ku penemu orang ke jai.

²⁵Ati mensia dipeda ari gaya mua iya ti tusah tauka gaga.

²⁶Enti ati iya lantang mua iya dipeda gaga. Tang ngaga jaku dalam sigi begunaka runding ti dalam.