Read Iban Sirakh 14 Bible Online

Sirakh 14 - Iban bible

Sirakh 14

¹Pengelantang Orang ke Enda Salah Beberekat meh orang ke enda kala bejaku sengapa, laban iya nadai berasai tusah irauka penyalah.

²Beberekat meh orang ke enda ngasaika diri salah, lalu iya enda kala lenyau pengandal. Kepapas Ati Enggau Pengerangka

³Sigi enda patut orang ke rangka nyadikaya. Nama guna reta tengkira ba orang ke amu?

⁴Barang sapa ke ngiga pengeraja sampai iya empu merinsa, iya nugungka pengeraja nya ke orang bukai. Orang bukai deka nguna pengeraja nya idup senang lantang.

⁵Enti orang nya rangka enggau diri empu, baka ni iya deka gerah jari enggau orang bukai? Neh iya empu enda ngasaika pengeraja diri.

⁶Nadai orang ke pengabis rangka ari orang ke rangka enggau diri empu. Nya meh ukum penyai iya.

⁷Taja iya ngereja utai ti manah, pengawa nya ukai digaga enggau sengaja. Lama laun pengerangka iya deka ayan.

⁸Orang ke kepapas ati endang orang jai; sida enggai nulung orang.

⁹Orang ke amu sigi enda nemu puas ati enggau utai ti dikemisi iya. Pengamu ngasuh iya ngira diri empu aja, lalu iya enda lantang.

¹⁰Orang ke rangka udu ngenyadi sampaika enda chukup pemakai dempa diri empu. Jalai Nguna Pengeraja Enggau Manah

¹¹Anak aku, jaga manah meh diri empu. Enjuk meh pemeri ti patut ngagai Tuhan.

¹²Ingat meh, ila nuan deka parai sebarang maya.

¹³Sebedau hari nya datai, nuan patut begulai manah enggau bala pangan nuan. Beri ngagai sida utai enggau naka ulih nuan.

¹⁴Kelantangka diri empu diatu, lalu anang nagang pengingin ti manah,

¹⁵laban ila semua asil kereja nuan deka ditinggalka nuan, lalu dibagi orang bukai.

¹⁶Nya alai, nuan patut meri, nerima, sereta diau senang, laban di dunya pemati semua utai nya nadai agi.

¹⁷Mensia endang nemu luya baka baju. Endang adat kenyau ari kelia, semua kitai mesti parai.

¹⁸Baka kayu ti beganti daun, bisi ruruh, bisi tumbuh, baka nya mega kitai mensia, bisi parai, bisi ada.

¹⁹Semua utai ti digaga mensia nemu rusak, lalu lenyau sebaka enggau orang ke ngaga iya. Pengelantang Orang Ke Ngiga Penemu Dalam

²⁰Beberekat meh orang ke berundingka Penemu Dalam, lalu bekira ngena akal sida.

²¹Orang ke berundingka tuku penemu-dalam, deka tetemuka utai ti dipelalaika iya.

²²Giga meh Penemu Dalam baka orang ke ngasu, lalu ipa meh Penemu Dalam ba jalai iya.

²³Tilik ari jenila iya, lalu pendingka nengah pintu iya.

²⁴Belangkau meh enggau naka penyemak rumah iya,

²⁵nya baru nuan deka diau nyamai.

²⁶Engkah bala anak nuan dalam ibun iya. Idup enggau likun dalam jaga iya, lalu diau dalam mulia iya, sereta dilindung iya ari panchar pengangat matahari.