Read Iban Sirakh 15 Bible Online

Sirakh 15 - Iban bible

Sirakh 15

¹Upah Pengelurus Orang ke nangika Tuhan nunjukka penangi iya dalam pengawa iya. Orang ke talukka Adat Tuhan deka bulih Penemu Dalam.

²Penemu Dalam deka nyambut nuan baka indai tauka baka pengantin indu dara bungas.

³Nuan deka diberi iya pemereti baka pemakai enggau Penemu Dalam baka ai irup.

⁴Orang ke bepanggai ba iya enda rebah, lalu orang ke arapka iya enda deka malu.

⁵Penemu Dalam deka ngasuh nuan dibasa lebih ari bala pangan nuan, lalu nuan deka diberi leka jaku ti betul lebuh nuan bejaku di mua orang mayuh.

⁶Nuan deka tetemuka pengaga enggau pengelantang ti amat, lalu nama nuan deka dikingatka selama-lama iya.

⁷Orang ke beli enda bulih Penemu Dalam, lalu orang ke bedosa enda meda iya.

⁸Penemu Dalam jauh ari orang ke sumbung, lalu nadai masuk runding orang ke rindu bula.

⁹Lagu puji nadai patut dinanyi orang ke bedosa, laban lagu sida ukai datai ari Tuhan.

¹⁰Lagu puji ti amat sigi isi Penemu Dalam, lalu diberi Tuhan empu. Peneka Ati Milih

¹¹Enti nuan bedosa anang nyalah Tuhan laban Iya enda ngaga utai ti enda dikarindu Iya.

¹²Anang bejaku ngumbai Tuhan nesatka nuan, laban Iya enda begunaka tulung orang ke bedosa.

¹³Tuhan benchika semua kereja jai, lalu orang ke nangika Tuhan enda mega rinduka kereja jai.

¹⁴Lebuh Tuhan ngaga mensia keterubah iya kelia, Iya merika sida kuasa meri pemutus.

¹⁵Enti nuan deka, nuan ulih talukka pengasuh Tuhan. Nuan tau milih sekalika deka talukka Iya tauka enggai.

¹⁶Tuhan ngengkahka api enggau ai di mua nuan. Ambi aja ni ti dikedeka nuan.

¹⁷Idup enggau mati bisi ba mensia. Ni ti dipilih sida nya meh diberika sida.

¹⁸Besai meh Penemu Dalam enggau kuasa Tuhan, lalu Iya meda semua utai.

¹⁹Iya nemu semua utai ti dikereja mensia, lalu beratika orang ke arapka Iya.

²⁰Iya enda ngasuh orang ngaga pedilindung iya ari panchar pengangat matahari.