Read Iban Sirakh 17 Bible Online

Sirakh 17 - Iban bible

Sirakh 17

¹Tuhan ngaga mensia ari tanah, lalu ngasuh sida pulai ke tanah.

²Iya ngeletak umur sida, lalu meri sida kuasa atas semua utai di dunya tu.

³Iya ngaga sida baka gamal Iya empu, lalu meri sida pengering.

⁴Tuhan ngaga sida dikenakutka semua utai idup, lalu meri sida kuasa atas semua burung enggau jelu.[12]

⁶Iya meri sida dilah, mata, pending enggau untak kena bepikir.

⁷ Iya meri sida penemu enggau pemereti ngambika sida ngelala pemanah enggau penyai.

⁸Iya meri sida pemereti Iya ke dalam ati sida ngambika sida meda pengawa Iya ti manah.[13]

¹⁰Nya baru sida deka muji nama Iya ti kudus, lalu meritaka pemesai pengawa Iya.

¹¹Kelimpah ari nya Tuhan meri sida penemu, lalu meri sida Adat ke lalau pengidup sida.

¹²Iya ngaga sempekat ti tetap enggau sida, lalu madahka pemutus Iya ngagai sida.

¹³Sida meda pemesai mulia Iya, lalu ninga nyawa Iya ti bekuasa.

¹⁴Iya nangkan sida ngambi enda ngaga penyai, lalu ngajar genap iku sida begulai manah enggau pangan diri. Tuhan Nyadi Akim

¹⁵Tuhan sigi selalu nemu ulah mensia. Sida enda ulih belalai ari Iya.[14]

¹⁷Genap bansa diberi Iya siku tuai, tang bansa Israel enggi Tuhan empu.[15]

¹⁹Tuhan selalu ngemataka pengawa mensia. Ba Tuhan semua pengawa mensia sigi terang baka siang hari.

²⁰Nadai penyai mensia ulih dipelalaika ari Tuhan, semua penyalah ditemu Iya magang.[16]

²²Sedekah ti diberi kitai ngagai orang miskin dianggap Tuhan berega baka tinchin. Pengasih kitai sigi dijaga Tuhan baka nyaga leka mata.

²³Ila Tuhan datai ngakim penyai mensia, lalu ngukum sida; sida deka nerima utai ti patut diterima sida.

²⁴Tang orang ke nesal ati diterima pulai ngagai Iya, lalu orang ke lenyau pengandal deka diperindang Iya. Kangau Ngambi Berubah

²⁵Datai meh ngagai Tuhan, lalu lengkaka penyalah kita. Besembiang di mua Iya, lalu anang majak ngaga penyai.

²⁶Pulai meh ngagai Tuhan ke Pemadu Bekuasa, lalu anang agi ngaga penyalah. Begedi meh ke penyai enggau naka ulih kita.

²⁷Orang ke idup ulih meri terima kasih ngagai Tuhan. Tang ba dunya pemati, sapa ke ulih menanyi muji Iya ke Pemadu Bekuasa?

²⁸Orang ke idup sereta gerai ulih muji Tuhan. Tang sida ke parai udah nadai agi; sida udah badu meri terima kasih.

²⁹Naka meh pemesai pengasih enggau pengampun Tuhan ngagai orang ke pulai ngagai Iya.

³⁰Tang mensia enda ulih ngempu semua utai laban mensia tetap parai.

³¹Nadai utai lebih tampak ari matahari, tang bisi maya penampak nya kerabur. Nama agi dikira pasal mensia ke semina bepikirka penyai aja.

³²Tuhan meda semua bintang di langit, tang mensia semina baka pasir enggau abus aja.