Read Iban Sirakh 18 Bible Online

Sirakh 18 - Iban bible

Sirakh 18

¹Pemesai Tuhan Tuhan ke idup selama-lama iya ngaga semua utai di bap langit.

²Iya aja ke lurus.[17]

⁴Nadai siku orang diberi Tuhan kuasa meritaka pengawa Iya, lalu nadai siku nemu enggau dalam pemesai utai ti digaga Iya.

⁵Sapa ulih nyukat kuasa Iya ti besai amat? Sapa ulih nusi pengawa Iya ti penuh pengasih?

⁶Kitai enda ulih nambah tauka ngurangka iya. Kereja ajih Iya endang sigi enda ulih disagam ati mensia.

⁷Lebuh kitai datai ba ujung cherita Tuhan, iya ti bendar, kitai empai berengkah; kitai ngetu laban temati kutu nadai penemu agi. Mensia Nadai Reti

⁸Nama mensia, lalu nama guna sida? Nama reti pemanah enggau penyai ti dikereja mensia?

⁹Ba penemu mensia, seratus taun udah panjai umur.

¹⁰Enti dibanding enggau pengelama ti nadai pengujung, semua taun nya baka setitik ai tasik tauka baka sesepur pasir.

¹¹Nya meh kebuah Tuhan amat besabar enggau kitai, lalu pengasih Iya belimpah-limpah.

¹²Iya meda kitai, lalu nemu pemalat pengerusak kitai ila, nya alai Iya udu ngampun kitai.

¹³Kitai mensia semina kasihka diri sama diri aja, tang Tuhan kasih ke semua mensia. Iya ngerara, ngatur sereta ngajar kitai. Iya ngiring kitai pulai ngagai Iya baka penyaga bedus ngibun bala bedus sida.

¹⁴Iya kasihka kitai lebuh kitai nitihka iring Iya, lalu ingin nerima pemutus Iya. Pemanah Enggau Pengasih

¹⁵Anak aku, lebuh nuan nulung orang anang lalu nganu sida. Lebuh nuan kasihka orang, anang mansutka jaku ti mediska ati sida.

¹⁶Jaku nuan baka ambun ti ngasuh chelap maya panas terit lalu lebih berega ari pemeri.

¹⁷Jaku ti manah lebih berega ari pemeri ti badas. Tang orang ke amat kasih deka meri kedua-dua utai nya.

¹⁸Orang ke beli enda meri tang bejaku jai. Pemeri ti disempulang enggau jaku jai enda ngasuh ati orang senang. Meresa Diri

¹⁹Belajar dulu sebedau bejaku, lalu jaga pengerai nuan sebedau sakit.

²⁰Peresa dulu ati nuan sebedau nuan diakim Tuhan, ngambi lebuh maya jam datai nuan bulih pengampun.

²¹Ngemaruhka diri sebedau nuan diukum ngena penyakit. Lebuh nuan bedosa, nuan mesti nesal ati.

²²Enti nuan bisi ngaga danji enggau Tuhan, titihka danji nya sebedau nuan parai.

²³Tang sebedau nuan ngaga danji, nuan mesti besedia ngereja iya, lalu anang nguji pengeliat ati Tuhan.

²⁴Diatu berunding meh ke pengeringat Tuhan ba hari ke penudi dalam pengidup nuan. Lebuh nuan diakim Iya ila, kati nuan deka dipelakangka Iya?

²⁵Lebuh nuan kaya bisi mayuh reta, ingatka maya lapar enggau miskin.

²⁶Jam jampat nginsit ari pagi sampai lemai, semua utai ulih berubah enggau jampat ba mua Tuhan.

²⁷Orang ke pintar bejimat dalam semua pengawa sida. Ba tugung orang ke bedosa, sida bejaga ngambika enda ngaga penyalah.

²⁸Semua orang ke mereti ngelala penemu-dalam, lalu muji orang ke bisi penemu-dalam nya.

²⁹Orang ke meretika jaku sempama deka pintar, lalu bejaku ngena mayuh jaku sempama enggau nyemetak. Nguasaka Diri Empu

³⁰Anang dikuasa ulih macham-macham pengingin nuan, tang jaga meh pengingin tubuh nuan.

³¹Enti nuan ngiga utai ngemuaska semua pengingin nuan, nuan deka diketawaka munsuh nuan.

³²Anang ngiga penyenang dalam pengidup ti kaya, belanja ti dikena nuan baka nya deka ngenusah nuan.

³³Enti nuan enda chukup duit, anang berutang kena muka pengerami besai ngambika nuan enda miskin.