Read Iban Sirakh 19 Bible Online

Sirakh 19 - Iban bible

Sirakh 19

¹Kuli ke pemabuk enda ulih kaya, lalu orang ke enda beratka pekara ti mit, lama-laun miskin meh iya.

²Ngirup ai bisa enggau indu nesatka orang ke pintar, lalu orang ke bejegau begulai enggau indu sundal nyau majak enda nemu malu.

³Pengujung iya, ulah ti nemu malu mai pemati ngagai sida, lalu tubuh sida ti but nyadika pemakai ulat. Jaku Sengapa Ngasuh Tusah

⁴Beli orang ke jampat arapka orang ke enda dikelala. Orang ke bedosa ngemedis diri empu.

⁵Orang ke deka amat ngaga penyai deka diukum.

⁶Orang ke enggai bejaku sengapa ulih ngelaungka penusah.

⁷Anang nampung utai ti dipadah orang ngagai nuan, nya baru nuan enda nesal.

⁸Anang becherita ngagai pangan tauka ngagai orang ke ngelaban nuan, semadi meh nya nyadi dosa enti nuan enda madah.

⁹Orang ke ninga jaku nuan nya deka bejimat enggau nuan, lalu ila iya deka benchika nuan.

¹⁰Enti nuan ninga berita angin, simpan dalam ati dataika nuan mati. Anang irau enda nuan meletup laban nya.

¹¹Orang beli, ke nguji nagang diri enda nusi utai ti dipelalai, merinsa baka indu ke radai deka beranak.

¹²Genap berita ti bisi dalam ati orang ke beli sigi baka panah ti nanchum kaki sida. Ngerara Pangan

¹³Enti nuan ninga pangan nuan bisi ngereja utai salah, tanya ngagai iya empu. Nyangka utai nya bula. Tang enti amat, iya deka badu ngereja nya.

¹⁴Enti nuan ninga orang bukai nusi utai ti enda manah, tanya ngagai iya. Nyangka utai nya bula. Tang enti amat, iya badu bejaku pasal utai nya.

¹⁵Enti nuan bisi ninga utai ti enda manah pasal pangan nuan, tanya ngagai iya. Nyangka nya jaku petenah ngapa. Anang arapka semua utai ti didinga nuan.

¹⁶Nyangka orang nya salah sebut, lalu ukai utai nya ti ku iya. Sapa ari kita ke enda kala salah jaku?

¹⁷Enti nuan bisi ninga utai ti jai pasal pangan nuan, tanya ngagai iya sebedau nuan nyalah iya. Awakka pekara tu diatur nitihka Adat Allah Taala ke Pemadu Tinggi.[18] Penemu-dalam Ti Pelesu enggau Ti Amat

²⁰Semua penemu-dalam sebaka enggau penangi ke Tuhan lalu nyengkaum ngereja pengasuh Tuhan.[19]

²²Orang enda ulih bepenemu nengah jalai penyai, lalu orang ke bejimat enda nitihka jaku orang ke bedosa.

²³Sekeda orang bisi pemintar dikena ngereja penyai, lalu sekeda orang ke nadai penemu-dalam sigi beli.

²⁴Manah agi kurang pemandai tang nangika Tuhan, ari ti pintar amat tang ngelaban Adat Tuhan.

²⁵Bisi orang pintar sereta silik tang enda lurus, lalu bisi mega melit orang ngambika menang.

²⁶Bisi orang jai bejalai mungkukka diri enggau mua ti tusah, tang dalam ati iya penuh enggau runding deka nipu.

²⁷Iya merening ke bukai lalu ngaga diri enda ninga, tang lebuh nuan enda ngadang, iya ngulihka penguntung ari nuan.

²⁸Enti iya enda ulih ngaga penyalah maya nya, iya deka berumban ngereja utai nya lebuh bisi peluang.

²⁹Orang ulih ditemu ari gamal sida, orang ke pintar ulih ditemu ari gaya mua sida.

³⁰Perangai siku-siku orang ulih ditemu ari gaya iya bepekayan, ketawa enggau bejalai.