Read Iban Sirakh 2 Bible Online

Sirakh 2 - Iban bible

Sirakh 2

¹Penaluk ke Allah Taala Anak aku, enti nuan deka gawaka Tuhan, nuan anang enda nyediaka diri diuji sebarang maya.

²Tetap sereta teguhka ati nuan; anang irau lebuh penusah datai.

³Nuan anang enda tetap talukka Tuhan, lalu anang limpang ari Iya, nya baru nuan senang lantang jemah ila.

⁴Terima aja nama utai ti nyadi ba nuan, lalu liat ati, sekalika nuan dikeleseka,

⁵laban mas diuji dalam api, lalu orang ke dikerinduka Tuhan deka dikeleseka orang kena nguji iya.

⁶Arap ke Tuhan, nya baru Iya nulung nuan. Ruruska jalai pengidup nuan lalu andal ke Iya.

⁷Semua kita ke nangika Tuhan, anti aja meh pengasih Iya. Anang sekali-kali limpang ari Iya enggaika kita labuh.

⁸Semua kita ke nangika Tuhan, arap ke Iya. Kita tetap deka bulih upah.

⁹Semua kita ke nangika Tuhan, andal ke pengelantang, pengasih, enggau pengaga ti tetap enggi kita belama.

¹⁰Ingatka orang rebak ke dulu lalu peratika pekara tu: kati kala Tuhan ngelebu orang ke andal ke Iya? Kati kala Tuhan ninggalka orang ke bebasaka Iya? Kati kala Tuhan enda pedulika orang ke besembiang ngagai Iya?

¹¹Tuhan sigi mentas sereta penuh pengasih. Iya ngampun penyalah kitai lalu nyelamatka kitai ari penusah.

¹²Tang puntan meh orang ke kakang sereta lemi. Puntan meh orang ke bedosa sereta enda lurus.

¹³Puntan orang ke lemi ati laban enda andal, sida nadai bulih pengelindung.

¹⁴Puntan nuan enti enda tetap ati. Nama utai deka digaga nuan lebuh Tuhan datai nguji nuan?

¹⁵Orang ke nangika Tuhan sigi enda ngelaban pengasuh Iya. Orang rinduka Iya deka idup nitihka peneka Iya.

¹⁶Orang ke nangika Tuhan sigi nguji deka ngeyenangka Iya. Orang ke rinduka Iya deka talukka Adat Iya.

¹⁷Orang ke nangika Tuhan deka nyediaka ati sida, lalu ngemaruhka diri nyembah Iya. Lalu ku sida,

¹⁸“Aram kitai nyerahka nasib kitai ke dalam jari Tuhan, ukai ngagai jari mensia, laban pengasih Iya endang amat besai baka pemesai mulia Iya. Lalu nama Iya endang amat besai baka pemesai pengawa Iya.”