Read Iban Sirakh 20 Bible Online

Sirakh 20 - Iban bible

Sirakh 20

¹Maya Tau Bejaku Bisi jaku rara disebut ba maya ti enda patut. Kadang-kadang manah agi enda memunyi.

²Tang manah agi ga ngerara ari ti terus nganu.

³Orang ke ngaku penyalah diri enda rugi.

⁴Orang ke mejal atur iya ngena jalai kasar sebaka enggau orang diperiri ke deka masung indu.

⁵Bisi orang dikumbai pintar laban enda mayuh jaku, tang bisi ga dibenchi laban tekelalu pejaku.

⁶Bisi orang diau diri laban enda nemu nyaut, tang bisi mega orang diau diri laban nganti maya ti patut endur nyaut.

⁷Bisi orang ke bepenemu nagang diri bejaku nganti maya ti patut, tang orang ke pejaku sereta beli, majakka diri bejaku enda ngira maya.

⁸Orang ke bejaku tekelalu lama lalu enda meri peluang ngagai orang bukai deka dibenchi orang. Pekara ti Betentang

⁹Penusah tau mai penguntung, lalu pemujur ti enda disangka tau mai pengerugi.

¹⁰Kadang-kadang pemeri nuan nadai sekali mai penguntung, tang bisi maya pemeri nuan dibalas belipat-lipat.

¹¹Bisi orang ke dibasa tau nyadi malu, tang bisi orang ke baruh pendiau tau angkat lalu dibasa orang.

¹²Kadang-kadang utai dibeli dikumbai murah, tang iya ti bendar rega iya mar.

¹³Lebuh orang ke bepenemu bejaku, sida bulih mayuh pangan. Tang enti orang ke beli bejaku manah-manah orang enda peduli.

¹⁴Pemeri ari orang ke beli nadai guna ba nuan, laban iya ngarapka bulih balas ti mayuh.

¹⁵Iya meri mimit, tang udu nganu, lalu iya udu bejaku ingar-ingar ngambika di dinga orang. Seharitu iya nyale, tang pagila dipinta iya pulai baru. Orang ke baka nya patut dipegedi.

¹⁶Ku orang ke beli bejaku, “Aku nadai pangan. Nadai orang gagaka pemanah aku. Sida deka nerima pemeri aku aja, tang di belakang aku sida bejai aku.”

¹⁷Orang ke beli baka nya semampai dikeduan orang. Jaku ti Enda Patut

¹⁸Manah agi rebah laban salah singkang ari ti tekelanjur jaku. Orang ke jai deka rusak baka orang ke tekelinchir, lalu rebah.

¹⁹Orang ke enda beradat baka cherita ti enda setipak diulang belama ulih orang ke beli.

²⁰Jaku sempama ti disebut orang ke beli enda diterima, laban disebut ba maya ti enda patut.

²¹Bisi orang ulih nyeliahka dosa laban tekelalu miskin. Iya ulih diau diri nadai ngasai salah dalam ati.

²²Bisi orang deka lenyau basa laban sida malu bejaku di mua orang ke beli.

²³Bisi orang malu ngamatka janji enggau pangan iya, tang ukai reti nya seduai iya bemunsuh.

²⁴Ulah ti bula ngasuh orang jai amat, lalu orang ke enda beradat majak bula.

²⁵Penchuri manah agi ari orang ke bula, tang kedua-dua nya mai pengerusak.

²⁶Ulah ti selalu bula ngasuh malu, lalu pemalu nya semampai diasaika belama. Pemanah enggau Pengawa Orang ke Bepenemu-dalam.

²⁷Orang ke pandai bejaku deka mujur, lalu orang ke mereti dikerinduka bala pemesai.

²⁸Orang ke ngereja tanah iya tentu deka bulih asil ti mayuh. Baka nya mega orang ke dikerinduka bala pemesai deka bulih pengampun ketegal penyalah sida.

²⁹Pemeri enggau suap ngasuh mata orang ke pintar buta, lalu nagang sida ngerara orang enggau ati lurus.

³⁰Penemu-dalam ti disimpan pia aja sigi baka reta ti ditaruh; kedua-dua utai nya sama nadai guna.

³¹Endang manah agi orang nyimpan pemeli iya ari orang ke nyimpan penemu-dalam.