Read Iban Sirakh 21 Bible Online

Sirakh 21 - Iban bible

Sirakh 21

¹Dosa Dinga nuan anak aku, enti nuan udah bedosa, badu bedosa, tang besembiang ngambika dosa nuan diampun.

²Seliahka diri ari dosa baka ti nyeliahka diri ari ular. Enti nuan nyemakka diri, nuan tetap dipantuk iya. Ngeli iya baka ngeli singa ti ngasuh mensia parai.

³Genap pengawa ti ngelaban adat sigi bisi ninggalka abi telih ti enda ulih suman direjang pedang ti tajam bemata dua.

⁴Ulah ti jai sereta sumbung tau ngabiska pengaya reta. Baka nya meh rumah orang ke sumbung deka rubuh.

⁵Allah Taala ningaka sembiang orang ke seranta lalu jampat datai meri pengelurus ke sida.

⁶Orang ke enggai nerima bantah, nitihka bekau kaki orang ke bedosa. Tang orang ke nangika Tuhan deka nesal ati.

⁷Bisi orang tebilang landik bejaku, tang orang ke mereti nemu lebuh jaku orang nya bisi salah.

⁸Orang ke nginjau duit kena ngaga rumah baka orang ke ngumpul batu kena ngaga pendam iya.

⁹Raban orang ke jai disema baka tugung kayu api; pengujung iya, sida deka angus diempa api.

¹⁰Jalai ti ditengah orang ke bedosa alus sereta rata, tang pengujung iya nuju dunya pemati. Penemu-dalam enggau Pemeli

¹¹Orang ke deka ngasika Adat mesti belajarka Adat[20] Orang ke bisi penemu-dalam nya meh orang ke nangika Tuhan dalam semua utai.

¹²Semina orang ke pintar ulih diajar, tang bisi mega pemintar ti semina mai penusah.

¹³Penemu orang ke pintar baka ai sungai ti enda nemu langkang, lalu jaku ajar sida baka mata ai ti idup.

¹⁴Penemu orang ke beli baka benda ti bumbus; laban semua utai ti dipelajarka sida lenyau magang.

¹⁵Lebuh orang ke bepelajar ninga jaku ti bisi penemu, iya meri puji lalu bulih penemu ti baru, tang orang ke kurang penemu enda nyamai ati lalu muai penemu nya.

¹⁶Lebuh ninga orang beli bejaku, asai ti bejalai ngesan utai berat, tang lebuh ninga orang ke bepenemu bejaku, ati rindu amat.

¹⁷Jaku orang ke bepenemu diterima enggau manah ulih orang mayuh, lalu diperatika sida dalam ati.

¹⁸Ba orang ke beli penemu-dalam enda beguna baka rumah ke udah rubuh. Ba orang ke beli, penemu baka jaku ti nadai reti.

¹⁹Ba orang ke beli, belajarka penemu baka kungkung gelang sengapa,

²⁰tang ba orang ke bepenemu, iya baka gelang mas. Orang ke beli ketawa kakah-kakah, tang orang ke bepenemu enda bemunyi semina tuchum aja.

²²Orang ke beli nyeling ari pintu, lalu terus masuk, tang orang ke bepelajar nganti ba mua pintu enggau basa.

²⁴Orang ke enda beradat numpirka pending sida ba pintu, tang orang ke bepelajar malu ngereja utai baka nya.

²⁵Orang ke udu bejai orang bejakuka pekara ti nadai kaul enggau iya; tang orang ke bepenemu berundingka empa leka jaku diri empu.

²⁶Orang ke beli mansutka jaku sengapa ti bisi dalam runding iya, tang orang ke pintar berunding dulu sebedau mansutka jaku.

²⁷Enti orang jai nyumpah munsuh sida, sida nyumpah diri empu.

²⁸Orang ke udu bejai orang ngamahka nama diri empu, lalu dipegedi orang ke begulai enggau iya.