Read Iban Sirakh 23 Bible Online

Sirakh 23 - Iban bible

Sirakh 23

¹O Tuhan, Apai ke bekuasa atas pengidup aku, anang ngelakka aku dikuasa sereta dirusak ulih jaku aku empu.

²Beri aku penemu-dalam kena ngiring lalu ngajar aku maya aku bedosa, lalu ngubah aku maya aku salah.

³Nya baru pengawa aku ti salah enggau dosa aku enda nambah-senambah, lalu aku enda labuh ngagai jari munsuh aku, sereta enda diketawaka sida.

⁴O Tuhan, Apai enggau Allah Taala pengidup aku, jaga meh aku ngambika enda sumbung

⁵sereta enda ngembuan pengingin ti jai.

⁶Anang ngelakka aku dikuasa ulih pengamu enggau pengingin tubuh aku. Anang nyerahka aku ngagai pengingin ti ngasuh aku malu. Besumpah

⁷Kita anak aku, dingaka ajar aku pasal jalai bejaku ti betul. Orang ke nitihka ajar aku enda kena panjuk.

⁸Orang ke bedosa kena panjuk ulih jaku sida empu ti sumbung sereta betenahka orang.

⁹Anang nelebaka diri selalu besumpah ngena nama Allah Taala ti kudus.

¹⁰Ulun ke suah disipat endang semampai bisi abi ti melebai. Baka nya mega orang ke selalu besumpah ngena nama Allah Taala ti kudus, sigi enda dituchi ari dosa.

¹¹Orang ke selalu besumpah endang mayuh dosa, lalu rumah tangga iya semampai merinsa. Enti iya enda ngamatka sumpah iya, iya deka salah. Enti iya enda pedulika sumpah diri, iya dua kali salah. Enti sumpah iya enda enggau ati betul, iya enda ulih diampun, lalu ruang bilik iya deka penuh penusah. Jaku Sengapa

¹²Jaku ti kasar endang dosa, lalu mai pemati. Arapka orang Israel enda nyebut jaku nya. Orang ke lurus ngenyauhka diri ari ulah ti baka nya, lalu enda malut diri enggau dosa nya.

¹³Anang nelebaka diri bejaku kasar sereta kamah laban nya dosa.

¹⁴Ingatka apai enggau indai nuan lebuh begulai enggau bala pemesai. Anang sampai enda ingatka diri empu, lalu anang ngemalu diri di mua sida laban nuan teleba nyebut jaku ti beli. Ila nuan deka ngutuk diri, nyamai agi enti enda ada suba.

¹⁵Orang ke teleba bejaku jai ngemedis ati orang enda ulih berubah manah seumur iya idup. Penyalah Seks

¹⁶Mayuh jalai nambahka penyalah, tang siti tu ngasuh Tuhan ringat amat. Pengingin tubuh baka api ti mau, lalu enda ulih dipadamka dataika abis. Orang ke deka amat ngereja pengawa seks ketegal iya udu kanji, enda ulih nagang diri sampaika api nya ngasuh iya betu.

¹⁷Ba orang ke udu gila indu, tiap iku indu sigi ngasuh iya kanji, lalu iya baka nya belama enda nemu badu.

¹⁸Laki ke butang berunding munyi tu. “Sapa orang meda aku? Ditu petang; aku dilindung dinding, lalu enda dipeda orang. Nadai kebuah aku takut. Tuhan ke Pemadu Tinggi enda meh pedulika dosa aku.”

¹⁹Orang ke baka nya semina takut ditemu mensia aja. Iya enda ngira mata Tuhan sepuluh ribu kali tampak ari matahari. Tuhan meda semua utai digaga mensia, lalu nemu semua utai ti dipelalai dalam ati sida.

²⁰Iya nemu utai ti bedau enggau ti udah nyadi.

²¹Orang ke bepenyalah nya deka kena tangkap maya iya enda ngadang amat lalu diukum ba mua orang mayuh.

²²Baka nya mega orang indu ke enda talukka laki iya ke beranak enggau lelaki bukai deka diukum baka nya mega.

²³Kesatu, indu nya ngelaban Adat Allah Taala Ke Pemadu Tinggi. Kedua, iya salah ngelaban laki iya. Ketiga, iya butang baka indu sundal, lalu beranak enggau lelaki bukai.

²⁴Iya empu deka dibai ngagai nembiak Allah Taala, lalu bala anak iya deka merinsa ketegal penyalah indai sida.

²⁵Sida enda dikerinduka orang mayuh, lalu enda ulih nirika ruang bilik.

²⁶Indu nya enda dibasa orang agi ke selama iya. Udah iya mati nama iya agi dikutuk orang.

²⁷Nya baru orang nemu, nadai utai manah ari ti idup nangika Tuhan, lalu nadai utai lebih badas ari ti taluk k a pengasuh Iya.