Read Iban Sirakh 24 Bible Online

Sirakh 24 - Iban bible

Sirakh 24

¹Muji Penemu-dalam Penemu-dalam muji diri, lalu temegah ba orang Israel nembiak iya,

²di mua nembiak Allah Taala Pemadu Tinggi enggau di mua kuasa Iya:

³“Aku meh jaku ti bepun ari Iya Ke Pemadu Tinggi, baka ambun ngebap dunya.

⁴Aku diau ba endur ti tinggi, penuduk aku di atas remang.

⁵Siko aku aja ngelingi langit lalu ngerencah tasik di baruh dunya.

⁶Aku nguasa serata dunya, gelumbang tasik, enggau semua bansa mensia.

⁷Aku ngiga endur diau ba entara sida: siti menua endur netapka diri.

⁸Iya ke Pengaga semua utai di bap langit, ngaga aku, lalu nentuka tempat endur aku diau. ‘Diau meh di Israel,’ pia ku asuh Iya, ‘peturun Jakob deka enggi nuan.’

⁹Aku digaga Iya kenyau ari pun, lalu mengkang meruan bisi selama iya.

¹⁰Aku bekerejaka Iya dalam Langkau Tuhan, lalu diau ba Bukit Sion.

¹¹Iya netapka aku ba nengeri ti dikerinduka Iya; aku diberi kuasa atas nengeri Jerusalem.

¹²Lalu beurat meh aku ba bansa ti penuh basa dipilih Tuhan ke enggi Iya.

¹³Aku tumbuh baka kayu sidar di Lebanon, baka kayu saipres di Bukit Hermon.

¹⁴Aku mansang baka kayu engkerema di Engedi, baka bungai ros di Jeriko, baka kayu kana ti manah di emperan, baka kayu berangan mansang besai di tebing ai.

¹⁵Aku bau rengut baka kayu manis, baka minyak wangi enggau mur ti bau rengut, baka bau wangi enggau asap menyan di Langkau Tuhan.

¹⁶Baka kayu oak aku ngerembaika dan aku; pating dan aku manah amat dipeda.

¹⁷Baka kayu anggur aku nyumbukka teresak ti manah, bungai aku nyadi buah ti lebat sereta nyamai.[22]

¹⁹Datai meh barang sapa ke inginka aku, empa meh buah aku dataika kenyang.

²⁰Orang ingatka aku lebih manis ari ai manyi, lalu aku manah agi ari ai manyi ti diambi ari sarang iya.

²¹Orang ke makai aku, agi deka makai aku belama, lalu orang ke ngirup aku enda nemu puas.

²²Ngasika aku, lalu nuan enda malu. Kereja nunda jaku aku, lalu nuan enda bedosa. Penemu Dalam Enggau Adat

²³Penemu-dalam bisi ba Sempekat Allah Taala ke Pemadu Tinggi, iya nya, Adat ti diberi Moses ngagai kita nyadika pesaka orang Israel.[23]

²⁵Adat nya penuh enggau penemu-dalam baka Sungai Pison tauka Sungai Tigris maya musin buah.

²⁶Adat nya penuh enggau pemereti baka Sungai Eupratis tauka Sungai Jordan maya musin ngetau.

²⁷Adat nya penuh enggau ajar baka Sungai Nile tauka Sungai Gihon lebuh musin ngumpul buah anggur.

²⁸Mensia keterubah menya enda nemu penemu-dalam enggau betul, lalu mensia ke dudi enda mega meretika iya,

²⁹laban runding iya lebih perisi ari tasik, lalu lalau iya lebih dalam ari tasik besai di baruh dunya.

³⁰Aku tu baka parit ti mai ai ari sungai ngagai kebun.

³¹Tuju aku meri ai ngagai kebun enggau bakut chemai aku. Tang enggau ngenyit parit aku nyadi sungai, lalu sungai nyadi tasik.

³²Aku deka naburka ajar aku ngambi dipeda ari jauh baka mata hari tumbuh.

³³Aku deka madahka ajar aku baka nabi, lalu meri iya nyadi reta semua rebak dudi ila.

³⁴Awakka kita nemu pengelelak aku ukai kena nguntungka aku aja, tang ke penguntung semua orang ke deka ke penemu-dalam.