Read Iban Sirakh 25 Bible Online

Sirakh 25 - Iban bible

Sirakh 25

¹Orang Ke Patut Dipuji Bisi tiga iti pekara ti dikedeka aku amat, ti ngerinduka Allah Taala tauka mensia, iya nya, orang diri menyadi ke begulai manah enggau pangan diri, orang ke begulai pendiau ke begulai badas enggau pangan diri enggau orang diri melaki-bini ke idup senang lantang.

²Bisi tiga bengkah pendiau mensia ti dikenggaika aku laban perangai sida udu ngemalu aku, iya nya, orang seranta ke sumbung, orang kaya ke udu bula enggau lelaki ke tuai umur ke beli sereta rindu butang.

³Utai ti enda dipelajarka maya agi biak, tentu enda ulih dipelajar lebuh nyau tuai.

⁴Penemu ti menyana enggau lalau ti manah sigi setipak amat enggau orang tuai ke buban bulu pala.

⁵Penemu-dalam, pemereti ati enggau lalau ti manah, setipak bendar enggau orang ke dipebasa nyengkaum orang ke nyau tuai umur.

⁶Pangkat orang ke tuai umur, iya nya, mayuh peneleba enggau penangi sida ke Tuhan ngasuh sida temegah ati.

⁷Bisi semilan bengkah orang ke dikira aku lantang senang, kelebih agi iya ke sepuluh dipuji aku amat, iya nya: orang ke temegah ati ketegal bala anak iya, orang ke ampit meda pengalah munsuh iya lebuh iya agi idup,

⁸orang ke bisi bini ke mereti, orang ke enda kereja berat keledai enggau chapi, orang ke enda bedosa ngena mulut iya, orang ke enggai gawaka orang ke kurang ari iya,

⁹orang ke bisi pemereti ati, orang ke dipendingka lebuh iya bejaku.

¹⁰Besai amat meh orang ke bisi penemu-dalam! Tang iya ke pemadu besai ari semua sida, iya nya, orang ke nangika Tuhan.

¹¹Orang ke baka nya sigi nadai banding laban ati Iya ti nangika Tuhan, nya meh pekara ti pengabis besai di dunya.[24] Indu Ke Jai

¹³Nadai telih ti lebih balat ari telih ati. Nadai penusah ti lebih ari penusah ketegal penyai orang indu.

¹⁴Nadai pemerinsa ti lebih merinsa ketegal dipegedi orang. Nadai dendam ti lebih ari dendam munsuh.

¹⁵Nadai rachun ti lebih bisa ari rachun ular, lalu nadai pengeringat ti lebih balat ari pengeringat indu[25].

¹⁶Senang agi sebilik enggau singa tauka naga ari ti begulai enggau bini ke jai.

¹⁷Penyai orang indu ngubah gamal iya baka gamal jugam.

¹⁸Laki iya enda tau enda rari, lalu makai ba rumah orang bukai, lalu tusah ati amat laban penusah ke baka nya.

¹⁹Tiap iti penusah nyau mit ti dibanding enggau penusah ketegal penyai orang indu. Awakka iya diukum baka orang ke bedosa.

²⁰Lelaki ke enda bemunyi ke bisi bini ke mayuh jaku baka orang tuai ke niki bukit pasir.

²¹Anang inginka orang indu ketegal pemajik iya. Lalu anang narit ati orang indu ketegal pengeraja iya.

²²Enti bini nupi laki iya, iya tentu deka nganu, ngemeli sereta ngemalu laki iya.

²³Bini ke jai ngenusah laki iya, ngasuh pedis ati, sereta chelum mua. Bini ke enda ngelantangka ati laki, ngasuh laki iya lemi, lalu nadai daya.

²⁴Dosa bepun ari indu siku, lalu ketegal iya kitai mati magang.

²⁵Anang ngelakka bini ke jai bejaku peneka ati, baka ai dalam tangki ti enda ditejuka pantis.

²⁶Enti iya enggai ngasika jaku nuan, beserara meh enggau iya.