Read Iban Sirakh 26 Bible Online

Sirakh 26 - Iban bible

Sirakh 26

¹Pengelantang Orang Ke Bisi Bini Ke Manah Amat lantang meh laki ke bisi bini ke manah, lalu umur iya deka nambah dua kali lipat.

²Bini ke manah ati sigi ngasuh ati laki iya lantang senang sampaika iya idup nadai pengirau sepemanjai umur iya.

³Bini ke manah endang berekat ti besai ari Tuhan ngagai orang ke nangika Iya.

⁴Sakalika kaya tauka miskin, ati seduai iya selalu senang, lalu mua sida nampak gaga. Bini Ke Jai

⁵Bisi tiga bengkah pekara ti ngenakutka ati aku, iya nya: pengawa bejai orang ti sebebu ngapa di sebelah pasar, orang jai begelumu bebala mayuh, enggau pengawa nyangka ngapa. Semua nya lebih jai ari pemati. Pekara keempat ti balat ngenakutka aku,

⁶iya nya, penusah enggau ati begedi ketegal indu ninding indu bukai, lalu changka jaku mantah genap orang.

⁷Bini ke jai endang baka tanchang chapi ti gerah; ngibun iya asaika megai kala.

⁸Indu ke mabuk ngasuh orang ringat amat laban iya mandangka ulah iya ti meri malu.

⁹Bini orang ke enda taluk dikelala ari gaya iya merening orang lelaki.

¹⁰Jaga meh anak indu ke kieh. Enti enda pia, iya deka salah guna ngena peluang ti bisi ba iya.

¹¹Jaga gaya iya ti enda nemu malu, lalu anang tekenyit enti iya ngemalu nuan.

¹²Iya duduk mikahka pah ngagai tiap lelaki ke inginka iya, baka orang bejalai ke aus deka ngirup sebarang ai. Puji Ngagai Bini Ke Manah

¹³Pendiau bini ti manah ngerinduka ati laki iya, lalu pemandai iya ngasuh laki iya temegah ati.

¹⁴Bini ke imun nya pemeri Tuhan; lalu ulah ti baka nya nadai endur mantah.

¹⁵Bini ke bisi basa sereta likun pendiau sigi berega amat, lalu enda ulih banding enggau utai bukai.

¹⁶Pemajik bini ke manah dalam ruang bilik ti teratur baka matahari ti manchar di langit Tuhan.

¹⁷Gamal ti bajik enggau paras tubuh ti manah, baka lampu ti terang ba penuduk lampu di Rumah Tuhan.

¹⁸Kaki ti manah enggau buku ali ti kering baka tiang mas bediri atas pirak.

¹⁹Anak aku, jaga pengerai nuan lebuh agi biak, lalu anang begulai enggau indu ke jai ulah.

²⁰Giga bini ke manah baka ngiga tanah ti gemu endur nanam benih nuan empu ti manah ngambi mansutka purih ke manah.

²¹Nya baru bala anak nuan deka idup, lalu mansang besai enggau pengarap bulih ruang bilik ti menyana.

²²Indu sundal baka ludah; indu ke bisi laki ke gila lelaki bukai mai pemati ngagai bala ambai iya.

²³Lelaki ke enda beradat endang patut bulih bini ke nadai pengarap, tang lelaki ke bebasaka Tuhan deka bulih bini ke manah.

²⁴Bini ke enda nemu malu rindu ngaga ulah ti enda manah, tang bini ke manah deka ngereja pengawa ti manah taja kediri enggau laki iya.

²⁵Bini ke rindu ngereja pengawa nitihka peneka ati diri empu baka ukui indu, tang bini ke nemu malu bebasaka Tuhan.

²⁶Enti indu bebasaka laki iya, orang mayuh nemu iya indu ke mereti; tang enti iya enda bebasaka laki iya enggau ati sumbung, semua orang nemu iya indu ke nadai pengarap. Lantang senang meh lelaki ke jadi enggau indu ti manah adat laban umur iya deka panjai dua kali lipat.

²⁷Bisi indu ke pejaku enggau nyawa nyaris baka bunyi terumpit tanda deka nyerang, lalu lelaki ke ngembuan bini ke baka nya asai ke diau dalam perang belama.[26] Utai Ti Ngenusahka Ati

²⁸Bisi dua bengkah pekara ti ngasuh aku tusah ati, lalu iya ti ketiga ngasuh aku ringat, iya nya: soldadu ke nyadi miskin, orang pintar ke enda dipebasaka, orang manah ke nyadi jai. Orang ke baka nya deka diukum Tuhan enggau pemati.

²⁹Tusah am at deka mujur bedagang ngena jalai ti lurus.