Read Iban Sirakh 27 Bible Online

Sirakh 27 - Iban bible

Sirakh 27

¹Mayuh orang bedosa ketegal duit, lalu orang ke inginka pengaya nutup mata sida ngaga diri enda meda.

²Dalam pengawa bejual-bebeli, tusah amat deka nyeliahka diri ari enda ngakal, baka penusah nyabut pasak dikepit batu.

³Ruang bilik orang ke enda nangika Tuhan sigi jampat deka anchur. Ati Ditemu Ari Jaku

⁴Penyai ati mensia deka ditemu ari jaku ti dipansutka iya baka utai ti enda diguna ti tinggal ba pengayak.

⁵Baka tajau ti diuji ngena api, baka nya mega perangai mensia diuji ngena jaku iya.

⁶Baka pemanah kayu ditemu ari buah iya, baka nya mega perangai mensia ditemu ari jaku iya.

⁷Anang guai muji orang sebedau ninga jaku iya, laban nya meh jalai nguji iya. Pengelurus

⁸Enti nuan ngiga pengelurus, nuan tetap bulih iya. Pengelurus nya baka pekayan orang bepangkat ti ngasuh iya dipeda lebih manah.

⁹Burung begulai enggau bansa sida empu. Baka nya mega orang ke lurus deka bependiau lurus.

¹⁰Baka singa ngipa dengah iya, baka nya mega dosa ngipa orang ke deka ngaga penyai. Jaku Ti Beli

¹¹Jaku orang ke kudus selalu bisi penemu ti manah, tang jaku orang ke beli selalu berubah baka bulan.

¹²Enti nuan bisi begulai enggau orang ke beli, giga meh peluang ngerarika diri ari sida, tang enti nuan bisi begulai enggau orang ke pintar, naka ulih meh begulai lama enggau sida.

¹³Jaku orang ke beli mediska ati, sida ketawa benung ngaga penyalah.

¹⁴Jaku sumpah sida ngasuh bulu nyeregu. Lebuh sida berengkah bekerakar, manah agi anang ninga.

¹⁵Jaku sida bejai pangan diri ngasuh orang pedis ati, lalu jaku kerakar sida ke sumbung tau ngujungka sida berekak. Nusi Utai Ti Dilalai

¹⁶Orang ke rindu nusi utai ti dilalai deka lenyau pengarap ari orang, lalu sida enda bulih pangan ke semak.

¹⁷Rinduka pangan nuan, lalu talukka iya. Tang enti nuan udah nusi utai ti dipelalaika iya, manah nuan ngenyauhka diri ari iya,

¹⁸laban nuan udah ngerusak kaul seduai baka orang ke ngerusak munsuh sida.

¹⁹Baka burung ti dilepaska nuan, iya enda pulai agi ngagai jari nuan, baka nya mega nuan deka lenyau pangan, lalu iya enda pulai agi ngagai nuan.

²⁰Anang ngiga iya laban iya udah jauh. Iya udah rari baka rusa ke rari ari panjuk.

²¹Telih ulih dibalut, lalu jaku ti ngelese ulih diampun. Tang sigi nadai pengujung meh orang ke nusi utai ti dilalaika orang. Pendiau Ti Pura-Pura

²²Orang ke ngijapka mata ngagai nuan mesti bisi runding ti jai, lalu nadai siku orang ulih nagang iya.

²³Lebuh iya begulai enggau nuan jaku iya sigi manis. Semua jaku nuan dipuji iya. Tang di belakang nuan jaku iya lain; iya ngena jaku nuan ngelabuhka nuan.

²⁴Nadai orang dipegedi aku di dunya lebih ari orang ke baka nya, Tuhan mega begedika iya.

²⁵Orang ke nikauka batu ke atas, pala iya deka ditinggang batu nya. Orang ke deka nelihka orang, iya empu deka telih.

²⁶Orang ke numbak lubang, iya empu deka labuh kia, lalu orang ke ngenan panjuk deka dipangka panjuk iya empu.

²⁷Orang ke ngereja penyai deka kena laban penyai iya empu, lalu iya enda nemu ari ni penatai nya.

²⁸Orang ke sumbung rindu ngemeli sereta bejai orang, tang iya deka nerima balas baka siku singa ti nganti iya.

²⁹Orang ke rindu meda pemerinsa orang lurus deka labuh ke dalam panjuk, lalu sida deka ditinggang mayuh pemerinsa sebedau parai. Malas Dendam

³⁰Pengeringat enggau dendam pendiau ti jai nguasa orang bedosa.