Read Iban Sirakh 28 Bible Online

Sirakh 28 - Iban bible

Sirakh 28

¹Orang ke malas dendam deka dibalas ulih Tuhan, lalu Tuhan deka ngitung dosa iya.

²Tang orang ke ngampun penyalah orang bukai deka diampun enti iya sembiang.

³Orang ke nendam orang bukai anang ngarapka diri bulih pengampun ari Tuhan.

⁴Enti iya enggai ngampun pangan diri ke sama mensia baka iya, sigi enda ulih iya besembiang minta dosa iya diampun.

⁵Enti siku mensia ke lemi nyimpan dendam, iya anang kiruh ngarapka dosa iya diampun.

⁶Ingat meh nuan maya nuan parai, lalu tubuh nuan deka but. Nya alai badu bemunsuh, lalu titihka semua pengasuh Tuhan.

⁷Ingatka pengasuh Tuhan, lalu anang bedendam enggau pangan diri. Ingatka janji Allah Taala ke Pemadu Tinggi, lalu ampun meh penyalah orang. Bekerakar

⁸Orang ke ngerarika diri ari ti bekerakar deka kurang agi bedosa, laban laya nyadi ari orang ke ringat.

⁹Orang ke bedosa ngachau kaul pangan, iya ngepunka pengawa ti bemunsuh ba orang ke idup menyana.

¹⁰Makin mayuh agi utai ditunu, makin mau agi api. Makin kieh ati orang, makin nyadi agi kerakar sida. Makin besai agi kuasa orang, makin balat agi pengeringat sida. Makin kaya agi orang, makin balat agi letup pengeringat sida.

¹¹Laya ti nyadi ngenyit ngasuh api mau agi, lalu ngujungka bebunuh.

¹²Enti bungai api disepu, api iya idup mau. Enti diludah api iya padam. Semua nya dikereja ngena mulut. Jaku Jai

¹³Orang ke rindu bula sereta nusi jaku petenah kia-kia patut dikutuk laban iya ngasuh mayuh orang ke idup lantang nyadi tusah.

¹⁴Orang ke rindu betenahka orang ngerusak mayuh orang lalu nya ngasuh sida ngampar ari nengeri siti ngagai nengeri siti. Mayuh nengeri ti kuat anchur, lalu ruang bilik orang ke besai pangkat rusak laban jaku petenah.

¹⁵Laban jaku petenah, mayuh bini orang ke badas disarak, lalu reta ti ulih peluh tulang sida nyau abis dirampas.

¹⁶Orang ke ninga jaku petenah enda bulih penyenang enggau pengelantang ati.

¹⁷Sipat ngena pengelunsin ngasuh tubuh melebai, tang jaku jai matahka tulang.

¹⁸Mayuh orang labuh laban pedang, tang mayuh agi orang labuh laban dilah.

¹⁹Beberekat meh orang ke enda kena laban jaku petenah, lalu lantang meh iya ke enda ngesan penanggul ti berat baka besi, lalu kaki iya enda ditanchang rantai temaga.

²¹Jaku ti jai ngujungka orang mati merinsa, tang ba sida nya, nyamai agi mati ari ti idup.

²²Orang ke lurus enda alah laban petenah, lalu sida enda betu laban api iya.

²³Orang ke ngelengkaka Tuhan deka tusah laban petenah. Lebuh api petenah idup makai sida, api nya enda ulih dipadamka agi. Petenah nya dikirum ngagai sida baka singa ti nyerang, lalu baka jelu rimau ti nguyas-senguyas.

²⁴Kati ukai tanah nuan ti dipagar nuan, lalu duit nuan ti disimpan dalam endur ti dikunchi?

²⁵Baka nya mega nuan mesti bejimat bejaku. Berunding sebedau mansutka tiap leka jaku, lalu tutup rapit mulut nuan baka ti ngunchi pintu.

²⁶Bejaga ngambika nuan enda salah jaku, lalu labuh ngagai j ari orang ke nganti peluang baka nya.