Read Iban Sirakh 29 Bible Online

Sirakh 29 - Iban bible

Sirakh 29

¹Ngijau Enggau Mulai Orang ke sinu meri pinjau ngagai pangan diri, lalu sebarang sapa ke nulung orang bukai ngereja pengasuh Tuhan.

²Nuan patut meri pinjau ngagai pangan diri lebuh iya suntuk. Enti nuan berutang, bayar utang nya dalam timpuh iya.

³Kamatka janji nuan enggau betul, nya baru nuan bulih utai ti dipeguna nuan sebarang maya.

⁴Mayuh orang ngira utai ti dipinjau baka barang ti ulih sida, nyentukka sida ngenusah orang ke nulung sida.

⁵Bisi orang bejaku enggau ati ti baruh, lalu sanggup nyium jari sampai sida ulih nginjau ari orang nya. Tang lebuh timpuh mayar utang datai, iya enda mayar laban ngaga diri agi suntuk tauka ngaga kebuah bukai.

⁶Tang enti orang ke meri pinjau nya ngansak nyau pemuas iya nagih, nasib enti iya bulih setengah. Tang enti enda bulih, orang ke nginjau nya sigi nipu iya, lalu enggau nadai kebuah seduai nyau bemunsuh. Nyadi orang ke nginjau, ukai masa, tang iya ngutuk, nganu sereta ngeleseka orang ke meri pinjau ngagai iya.

⁷Ketegal nya mayuh orang enggai dipinjau, ukai laban jai, tang laban takut ditipu. Meri Tulung

⁸Tang taja pia, patut besabar meh enggau orang miskin. Anang ngelakka sida nganti sedekah nuan.

⁹Tuhan ngasuh kitai nulung orang miskin; laban sida kurang pemisi, anang ngasuh sida pulai puang.

¹⁰Manah agi duit nuan lenyau kena nulung kaban belayan tauka pangan, ari ti lenyau laban betegar di baruh batu.

¹¹Kena meh reta nuan nitihka pengasuh Tuhan Ke Pemadu Tinggi; pengawa baka nya lebih beguna ke nuan ari ti nyimpan pengaya nuan kena nuan empu aja.

¹²Pengawa ti meri sedekah ngagai orang miskin nyadika reta nuan, kereja manah nuan nya deka nyelamatka nuan ari mayuh macham penusah.

¹³Maya betempuh enggau munsuh, pengawa manah nuan lebih kering ari terabai ti kuat tauka sangkuh ti berat. Nyamin Utang Orang Bukai

¹⁴Orang ke manah budi deka nyamin pangan iya ke berutang tang orang ke enda nemu malu enggai ngereja utai nya.

¹⁵Anang enda ingatka pemanah orang ke nulung nuan, laban ketegal nuan iya ngadai nyawa diri.

¹⁶Orang ke bedosa masau reta orang ke nulung iya,

¹⁷lalu iya enda nemu beterima kasih sereta enda ngingatka tulung orang nya.

¹⁸Ketegal nulung orang bukai, mayuh orang kaya lenyau reta lalu idup tusah; orang ke bekuasa lenyau rumah, lalu enggai enda enggai ngampar sebelah nengeri orang.

¹⁹Orang ke bedosa ke deka nyamin utang laban deka ngiga untung, deka kena chara.

²⁰Tulung meh diri sama diri enggau naka ulih nuan, tang bejimat, anang sampai nuan empu labuh laban nya. Numpang Di Rumah Orang

²¹Utai ti numur satu beguna dalam pengidup iya nya ai, pemakai, gari enggau rumah endur diau.

²²Manah agi idup miskin di langkau diri empu ari makai nyamai di rumah orang bukai.

²³Nuan patut puas ati enggau utai ti dikemisi nuan, baik mayuh tauka mimit, nya baru nuan enda dikeleseka laban diau numpang aja.

²⁴Merinsa meh pengidup orang ke baka temuai, ke pindah ari rumah sebuah ngagai rumah sebuah, laban iya enda ulih bejaku.

²⁵Nuan nerima temuai datai lalu nyediaka ai irup, tang sida nadai meri terima kasih ngagai nuan. Tambah agi iya ninga jaku ti ngemediska ati baka tu:

²⁶“O kampar, sediaka mija! Enti nuan bisi utai diempa, beri ke aku.

²⁷O kampar, angkat nuan aku bisi temuai ti dibasa aku. Menyadi aku deka datai, lalu aku begunaka bilik nuan!”

²⁸Ba orang ke beradat, mar amat deka nerima jaku kelese laban numpang rumah orang baka orang ke minjau duit dianu laban enda mayar utang.